Uns 500 tractoristas manifestáronse este luns en Arzúa (A Coruña) para esixir á Xunta e ao Ministerio de Agricultura que se impliquen na busca de solucións para o sector lácteo, ante os baixos prezos que se pagan aos gandeiros polo leite.

Tras a protesta en Santa Comba (A Coruña) o pasado 2 de agosto, na mañá deste luns medio millar de tractoristas saíron ás rúas de Arzúa nun percorrido que lles levou ata o tamén municipio coruñés de Melide. Alí sumáronse máis gandeiros e todos xuntos regresaron ao punto de partida nunha protesta que transcorreu "sen problemas", segundo o responsable do Sindicato Labrego Galego na zona, Xulio Fernández Carnero.

Convocados pola Plataforma en Defensa do Sector Lácteo, os manifestantes leron un manifesto diante das portas do Concello de Arzúa para pedir ás administracións elevar o prezo de compra do leite aos produtores.

Ao respecto da mobilización, Fernández Carnero destacou, en declaracións a Europa Press, que "foi un éxito de participación" para a bisbarra". Do mesmo xeito, engadiu que o SLG pediu ao comercio local o peche durante un par de horas e que esta iniciativa resultou "exitosa".

Como explicou o sindicato a través dun comunicado, a tractorada responde ao feito de que 3.000 granxas galegas perciben menos de 26 céntimos de euro por cada litro de leite, lonxe dos 33 céntimos que o Goberno calcula como custos de produción.