O alcalde de Vigo, Abel Caballero, advertiu este martes de que o Concello non aceptará a "humillación" e as "ameazas" da Xunta con respecto aos voos dende o Aeroporto de Peinador, e criticou a Núñez Feijóo e o conselleiro Agustín Hernández por actuar coma se o goberno autonómico fose o seu "corralito particular".

Nunha rolda de prensa, o rexedor vigués lamentou o "despropósito" da Xunta na negociación dos voos subvencionados, e denunciou a "ameaza" de Agustín Hernández de que "se Vigo non atende ao que di a Xunta, non haberá subvencións para voos o ano que vén". "Deben de crer que isto é o seu corralito particular, que o xestionan co seu criterio particular de antollos", sinalou.

Caballero recordou que as cidades "teñen dereitos" e que a olívica "non admite" esas "ameazas". A ese respecto, o alcalde pediu ao presidente da Xunta "que tome cartas" na cuestión dos voos porque "se están a superar todas as liñas vermellas" e preguntou "que se cren estes que é gobernar".

O alcalde confirmou que presentará ao Executivo galego un plan estratéxico a catro anos para o desenvolvemento de Peinador e que o devandito programa "se vai levar adiante por completo, con ou sen a Xunta".