O sindicato Comisións Obreiras (CC.OO.) denunciou que no primeiro semestre de 2010 se produciron 157 accidentes de traballo na Xunta de Galicia, dos cales o 50 por cento correspóndense coa Consellería de Traballo e Benestar e o 25 por cento a Medio Rural.

Neste sentido, CC.OO. destaca que, segundo datos facilitados pola Administración galega na última xunta do Comité intercentros de Seguridade e Saúde Laboral da Xunta, ser empregado de Traballo ou Medio Rural "prexudica seriamente a saúde", xa que comparativamente, "indican un alto risco engadido" respecto a outros ámbitos laborais.

Ao respecto, considera "totalmente inaceptable" que o ámbito laboral no que se producen a metade dos accidentes, como é a Consellería de Traballo e Benestar, "leve sin ser máis dun ano convocado" o comité de seguridade.

Aínda que no que vai de ano "hai unha lixeira diminución" de contratempos respecto ao mesmo período pasado, o sindicato apunta que "segue sendo especialmente preocupante" xa que, a investigación dos accidentes laborais na Administración autonómica é "tan só do 57 por cento", algo que ve insuficiente despois de que o Goberno galego se comprometese a investigar "polo menos o 75 por cento".

Así, instou a impulsar todas as avaliacións pendentes en todos os centros de traballo e empraza á Xunta a adoptar as medidas preventivas adoptadas nos protocolos.