A Policía Local detivo este venres a un home de 39 anos, veciño de Ourense, mentres ameazaba de morte cun coitelo no pescozo a unha muller de 71 anos na súa vivenda, situada no barrio do Couto, tras unha discusión. Varias dotacións policiais accederon de forma urxente á residencia da vítima tras recibir un aviso de que unha muller pedía auxilio no devandito piso.

No lugar, a primeira patrulla atopou ao detido no chan, encima dunha muller, ameazándoa de morte cun coitelo no pescozo, "polo que, ante a posibilidade de que seguise adiante coa súa intención, tivo que ser reducido e seguidamente detido", informaron fontes policiais.

Así mesmo, á marxe da investigación aberta para esclarecer o sucedido, o corpo de seguridade puido saber que a vítima coñecía ao detido porque este, supostamente, era cliente dunha casa de citas, polo que descartou que se trate dun caso de violencia machista. Non había denuncias previas entre ambos.

Como consecuencia desta intervención, a vítima foi trasladada a un centro sanitario, así como dúas mulleres máis -de 41 e 28 anos-, as cales se atopaban no domicilio no momento dos feitos. Tras sufrir un ataque de ansiedade, quixeron tamén ser atendidas.