Axentes da Garda Civil acharon na súa vivenda situada en Baiona (Pontevedra) o corpo sen vida dunha anciá de 82 anos, que levaba entre tres e catro días falecida e non presentaba signos de violencia.

Tal e como informaron fontes do Instituto Armado a Europa Press, veciños da muller comunicaron que levaban varios días sen ver nin poder contactar con ela, polo que unha dotación se desprazou ata a vivenda, localizada na rúa Monterreal.

Unha vez alí, descubriron o cadáver da anciá e comprobaron que no domicilio vivía o fillo da muller, quen ao parecer " non era consciente" do falecemento da súa nai e, malia que morrera varios días antes, seguiu vivindo con ela.

Por este motivo e ante a posibilidade de que o varón puidese padecer algún trastorno mental, os efectivos deron traslado da situación ao xuíz, quen dispuxo que fose recoñecido por un forense. Ademais, a muller será sometida a unha autopsia, aínda que todo apunta a unha morte natural, segundo as mesmas fontes.