Echa ún dos díes en casa por aquello de los virus y la galbana que traen y al dar el pasu, esi primer pasu tan amoriáu que paez ebriu de depués de los catarros, un fogonazu de lluz violento acaba churruscándote los güeyos de la que baxes a tirar la basura. Nesi momentu, supondrán -si ye que nun lo vivieron en carnes-, axúntense tolos llevantos anti-Nadal posibles. Más en posao y de nueves abellugáu, la tele, nun discutiniu de celebridaes, ofrezme la cara teórica y razonada del asuntu. “Caro bobu”, vien a dicir una esperta na materia, “col fríu y la escuridá del hibiernu quién va tener la santa moral de salir a mercar a la cai”.

Conque resulta ser que les bombilles ponen el puntu de color y calor que-yos falten a estes feches pa que cumplan la so función mercantil. Pero ehí ta lo gordo: les feches. Si yá ye simpático venir dende Benidorm con llotería pa dientro cinco meses, la gayola va aportar el día qu’a esti pasu, pongan les lluces n’agostu, coincidiendo col chornu “orbayosu” de dalgunos díes del branu y les rabies que mos dan al nun poder dir a la playa. Rises mil.