Esti día escoyí pal placerín una llibrería céntrica. Oiga, que nun voi de sabichegu, que mesmo garro a Millás qu’una guía de viaxes. Reconozo tamién que la cabra tira al monte y que suelo averame a lo poco que ponen n’asturianu. Detrás del armarín d’esta sección alcontré un par de treceañeres, una lleendo y otra copiando, despacino, discreto, unos párrafos d’un testu na llingua del Padre Galo. “Jo, tía, pero pa salir compramos algo”, dixo una, y la otra: “sí, venga, escribe rápido, que me da corte”. Petecióme dici-yos que tuvieren panches, que les otres diez persones facíen lo mesmo namás qu’ensin copiar.
Pero mire usté per onde, apaeció ún de los llibreros, en plan abusón, a da-yos el toque: “¿Qué diferencia hai ente la llibrería y la biblioteca...? Que na llibrería, págase”. Les moces, gaches, posaron el llibru y colaron mentes yo siguía la llectura. Y la verdá, nin me prestó l’últimu de Xuan Bello nin cuntaba llevalu si me prestara. El yá escesivu 30 o 40% que saquen los vendedores por llibru nun lu voi dexar enxamás ellí, abonden llibreros qu’amen los llibros. Búsquelos.
Comentarios
Hemos bloqueado los comentarios de este contenido. Sólo se mostrarán los mensajes moderados hasta ahora, pero no se podrán redactar nuevos comentarios.
Consulta los casos en los que 20minutos.es restringirá la posibilidad de dejar comentarios