O sindicato CC.OO. iniciará unha rolda de contactos cos diferentes grupos do Parlamento galego co obxectivo de trasladarlles a súa posición acerca do plan de axustes acordado este luns entre a dirección de PSA Peugeot Citroën en Vigo e o sindicato maioritario do comité de empresa, o SIT, e para buscar apoio e instar á empresa a que "reabra a negociación" sobre as devanditas medidas de axuste.

Segundo confirmaron a Europa Press fontes do sindicato, CC.OO. porase en contacto cos responsables de PP, PSOE, BNG e AGE para concertar encontros nos que lles darán a coñecer as medidas aprobadas pola empresa e o SIT que, a grandes trazos, contemplan unha redución salarial do 5 por cento, limitacións na actualización dos soldos, reducións e eliminación en varios complementos, desaparición do plus de antigüidade, etc.

O obxectivo do sindicato, que xunto a UGT, CIG e CUT rexeitou o plan da empresa, é forzar a PSA a que reconsidere as medidas e dea unha nova oportunidade á negociación. Esta iniciativa está "aberta a outros sindicatos que tampouco comparten a opinión da empresa e do sindicato maioritario", segundo apuntou o responsable comarcal de Industria de CC.OO., Ramón Sarmiento.

"Creemos que é bo facer partícipes aos grupos parlamentarios do que se aprobou este luns, porque a planta de PSA en Vigo é a empresa máis grande da industria de Galicia,", sinalou Sarmiento, quen criticou a "escaseza de compromiso industrial" da compañía. "A nós non nos vale a proposta de PSA e entendemos que a eles (aos partidos políticos) tampouco debería valelos", concluíu.