Más d'un centenar de carreteres de la rede asturiana requieren l'usu de cadenes pa circular y 13 d'elles tán zarraes al tráficu. Amás, les dos principales víes de comunicación cola meseta, l'autopista del Güerna y el puertu de Payares tán zarraes pa camiones y vehículos pesaos.

Asina lo informaron les páxines web del 112 Asturies y la Dirección Xeneral de Tráficu, tres les nevaes cayíes esta nueche, que cubrieron bona parte de la zona interior d'Asturies, incluyíu'l cascu urbanu de la capital, Uviéu.

Nestos momentos permanecen zarraos al tráficu'l puertu d'El Palu (AS-14), Alto de Bustantigu AS-364, Alto de la Marta (AS-364), Puertu de San Isidro o La Raya (AS-253), Puertu del Couniu (AS-348), Altu d'El Bayu (PO-2), Altu de la Cobertoria (AS-230), Puertu de San L.lorienzo (AS-265), Puertu Ventana (AS-228), Sotres-Llenda con Cantabria (AS-264), la subida a Los Llagos (CO-4), carretera Les Arriondes-Sinariega (PR-1) y la carretera de Carangas (PO-5).

Per otra parte, más de 110 carreteres repartíes per tola xeografía asturiana requieren l'usu de cadenes. Principalmente tán nes zones d'interior y de monte, tanto del centru, como del oriente y del occidente d'Asturies. El llistáu ta disponible na páxina web del 112 Asturies y na de la Dirección Xeneral de Tráficu.