A plataforma 'Salvemos Cabana' presentará o próximo mes de abril un Plan Comarcal de Desenvolvemento Sostible ás administracións municipal, provincial e autonómica como alternativa ao proxecto da mina de ouro de Corcoesto, en Cabana de Bergantiños (A Coruña).

Segundo explicou a plataforma, a intención deste plan é recordar que Galicia "é un territorio pre eminentemente rural", algo no que "reside a clave do seu futuro". Por iso, tratarán de "ofrecer unha alternativa viable" á mina que a canadense Edgewater Exploration formula para Corcoesto, algo que, consideran, "puiden ter efectos prexudiciais para o territorio e a saúde da poboación a medio e longo prazo".

"A idea é que a vida operativa da pretendida explotación, estimada nuns 10 anos, nin pode nin debe hipotecar o futuro da nosa terra", indicou a plataforma, ao tempo que recordou que se trata dun proxecto "non renovable".

A proposta de 'Salvemos Cabana' incluirá "dous aspectos clave". Por unha parte, o impulso ao sector primario en todo o referido á produción agroganadera de carácter ecolóxico. Por outra, o apoio á construción dun sector turístico forte, que dea cabida a novas vertentes, como o turismo verde, e que "cumpra cos máis altos estándares de calidade"

Ambas as dúas propostas están orientadas á "mellora das actividades empresariais" vinculadas á "utilización sostible dos recursos", fixando poboación e ofrecendo "oportunidades de emprego á poboación local que sexan perdurables no tempo".