El candidatu d'UPyD a la presidencia del Principáu nes elecciones adelantaes del pasáu domingu, Ignacio Prendes, dixo esti miércoles que nun-y sorprendió la situación xenerada n'Asturies tres el recuentu definitivu, incluyendo'l votu estranxeru, que dexa a UPyD, col so diputáu, como 'llave' del futuru Gobiernu asturianu. "Tamos preparaos, sabemos lo que queremos", señaló. Sicasí, descarta entrar nel futuru gobiernu asturianu.

Nel recuentu del domingu, el resultáu de les elecciones foi de 16 escaños pal PSOE, 13 pa Foru, 10 pal PP, 5 para IU y ún pa UPyD. Sicasí, l'escrutiniu de los votantes estranxeros favoreció que'l partíu de Francisco Álvarez-Cascos (Foru) pierda un diputáu na circunscripción occidental en beneficiu del PSOE. Poro, una hipotética alianza ente PSOE y IU sumaría 22 votos, los mesmos que sumaríen Foru y PP. UPyD decidiría entós.

Sobre la situación xenerada a partir de güei, Prendes indicó que nun cambia pa nada nin les sos idees nin la so estratexa. "Lo que nun sé ye si cambia la percepción qu'otros teníen de nosostros", añadió.

A preguntes d'Europa Press, Prendes dexó claro que queda "descartada" la posibilidá de qu'UPyD ente nel Gobiernu d'Asturies. Tampoco van asumir nenguna cuota de poder.

Preguntáu sobre qué 'bloque' preferiría pa la presidencia d'Asturies, si l'encabezáu por Javier Fernández (PSOE) o por Francisco Álvarez-Cascos, Prendes dixo que l'oxetivu de la so formación política ye precisamente "acabar coles polítiques de supuestos bloques antagónicos".

"Creemos qu'esos bloques nun respuenden a la realidá de la pluralidá asturiana, hai munchos más escenarios d'acuerdu ente unos y otros que de desacuerdu", indicó, al tiempu qu'insistió en qu'UPyD representa a esa "tercer España" que nun cree nun país engarráu.

D'esta manera, Prendes muéstrase abiertu al diálogu con toles fuerces polítiques. Y va apoyar al candidatu a la presidencia que coincida coles polítiques que defendieron dende que se constituyeron nel 2008. "Vamos siguir apostando poles reformes de caláu y fondes", indicó.

Tamién dixo que son partidarios de qu'exista una estabilidá" nel Gobiernu asturianu y que nun se repitan nin les irresponsabilidaes" de los últimos diez meses, cuando gobernaba Foru, nin los errores" que se cometieron na anterior lexislatura, cuando taben al frente del Executivu PSOE ya IU.