Eduardo Martínez Llosa (Foru) salió escoyíu nuevu alcalde de Siero en sustitución del socialista Guillermo Martínez. Va ser el cuartu alcalde de Siero en namás dos años, dempués de que la titular del Xulgáu de lo Contencioso-alministrativu númberu 6, d'Uviéu, almitiera'l recursu que presentaron trece conceyales de la oposición municipal pa celebrar un plenu municipal y llevar a cabu una moción de censura contra'l rexidor del PSOE.

Martínez Llosa, mientres la so intervención una vez escoyíu nuevu rexidor de Siero, manifestó la so intención de tar "abiertu a escuchar y a apoyar toles iniciatives positives pal conceyu", y señaló que la diversidá de formaciones polítiques "obliga al consensu y al diálogu permanente". "Na diversidá política de Siero ta la riqueza", añadió.

Dempués de mentar algunos de los problemes qu'han resolvese nel conceyu, el nuevu rexidor afirmó que va ser l'alcalde de tolos vecinos de Siero y aseguró que "Siero va ser una tierra pa quedar y non pa marchar".

"tirries y intereses personales"

Pela so parte, l'alcalde saliente, el socialista Guillermo Martínez, acusó a los conceyales qu'apoyaron la moción de censura de tornar el Conceyu de Siero en "un campu de batalla de tirries y intereses personales", y calificó de "reprochable" cuando les persones abandonen la disciplina del partíu.

Martínez preguntóse por qué los partíos qu'agora s'unen pa derrocalu del conceyu nun lo ficieron tres los comicios del 22 de mayu del 2011, y señaló que la so formación va collaborar col Gobiernu llocal, anque va tar alerta pa denunciar aquelles midíes que s'adopten en contra de los intereses de los vecinos de Siero.

"nun hai tresfuguismu"

Pela so parte, Luis Vázquez, voceru del Grupu Mistu, formáu polos cuatro diputaos qu'abandonaron les files del PP y que votaron a favor del nuevu alcalde, reprochó al anterior alcalde socialista que nun ficiera los deberes mientres estos cuatro meses. "Nun adoptó nenguna midida d'aforru y nin siquier ellaboró un anteproyectu de presupuestos pa esti exerciciu".

Tuvo tamién palabres pal so anterior partíu, el PP, y dempués de recordar a los sos antiguos compañeros que tovía nun tán espulsaos, definitivamente negó que practicaren nengún actu de tresfuguismu. "Cuando alguién se presenta como conceyal representa a tolos vecinos del conceyu, y polo tanto nun ha anteponer l'interés personal o partidista en llugar del conceyu al que representen".

Y añadió que si'l Partíu Popular esplicara na pasada campaña electoral a los votantes "que'l so partíu diba permitir que gobernara'l PSOE en llugar d'intentar llevar a la práctica'l so programa políticu, probablemente nun diba haber nengún conceyal del PP nel Conceyu de Siero".

Pela so parte, la Plataforma Vecinal de la Fresnea y Conceyu, apoyaron al nuevu rexidor argumentando que'l PSOE paralizó'l llabor municipal mientres el so agotáu mandatu. D'últimes Izquierda Unida, acusó a Foru y al PP de treslladar los sos problemes particulares del Principáu al Conceyu de Siero.

El nuevu plenu de la moción de censura llevó a Foru Asturies a l'Alcaldía, col apoyu de los cuatro ediles espulsaos del PP (Luis Vázquez, María Jesús Berdasco, Engracia Valle y Mauricio Bogomak), lo mesmo que de los representantes de los grupos Plataforma Vecinal de La Fresnea y Conceyu, colos que va gobernar en coalición.

La nueva oposición va pasar a tar formada pol PSOE (seis ediles), Izquierda Unida (trés ediles) y los dos conceyales del PP que nun avalaron la moción de censura.