Yá tenemos equí les primeres imaxes oficiales de '300: El origen de un imperio' ('300: Rise of an Empire'), la esperada secuela de '300', la épica cinta sobre la batalla de les Termópiles que protagonizó Gerard Butler.

Un proyectu que tardó muncho n'entamar pero que, otra vuelta basáu nuna novela gráfica de Frank Miller, va ver la lluz esti mesmu branu. Nesta ocasión va ser Noam Murro ('Smart people'), el que toma'l relevu de 'Zack Snyder' -productor y guionista de la cinta- y siéntase na siella de director nesta historia que, más que más que de secuela, podríamos calificar de spin-off de '300'.

Y ye que mientres que Leónidas y los sos colosales espartanos lluchaben cerca de la mariña, les batalles de '300: El origen de un imperio' van tener llugar n'ultramar, lo que va aportar nuevos aspectos visuales a la cinta que, en tou casu, paez que va caltener una estética bien asemeyada a la so predecesora.

"Ta bien vinculada visualmente cola orixinal", apunta Murro en declaraciones al diariu USA Today, nes que tamién afirma que'l fechu de qu'asocedan tantes coses nes embarcaciones va xenerar "unes coreografíes distintes dafechu de guerra y llucha".

Otra de les grandes diferencies va ser la bayura de trames y batalles que va contender '300: El origen de un imperio'. Dao que mientres la cinta orixinal centrábase puramente na épica fazaña de los espartanos nel pasu de les Termópiles, la nueva película "asocede coles mesmes en munchos llugares distintos". "Con seis batalles distintes les oportunidaes pa los dellos llugares y táctiques son muncho mayores", apunta'l director.

En tou casu, esi espíritu de David contra Goliat, de la resistencia d'unos pocos ante'l todopoderosu invasor, va siguir presidiendo les batalles de la nueva película. "Son cientos contra cientos de miles. Trátase de vencer con inxeniu y táctiques", señala.

L'AMENAZA D'ARTEMISA

Les fuerces de la potencia más poderosa ta encabezada principalmente por Artemesia (Eva Green), la vengatible y belicosa comandante de l'armada persa, que ye la segunda al mandu del vastu exércitu que dirixe Jerjes (al que vuelve dar vida Rodrigo Santoro).

La líder persa tien l'aliciente de tratar d'un axuste de cuentes de sangre contra los griegos que mataron a la so familia cuando ella yera una neña. Frente a ella alcontraráse Sullivan Stapleton, al que vimos en cintes como 'Brigada de Élite' o 'Animal Kingdom', que toma'l relevu de Butler y encarna al xeneral griegu Temístocles.

"Ella fai la mayoría del trabayu puercu de Jerjes nesta película. Busca de vengación... y failo bien", diz Stapleton. "Tien l'atractivu sexual, ye despiadada ya intrigante. Tien toles coses que maten a los homes", repostia Murro.

En cuanto al nuevu héroe, Temístocles, el director avisa que ye un personaxe muncho más complexu que'l rei espartanu Leónidas: "temístocles tien cicatrices de guerra y ye un lluchador, pero coles mesmes ye un políticu. Él nun ye'l rei. Tien que gobernar nuna democracia".

Y el so pueblu, les sos tropes, tampoco son homes nacíos y entrenaos por y pa la guerra, como lo yeren los espartanos, son humildes ciudadanos que tienen que defender la so tierra del invasor.

"Estes persones nun quieren lluchar, hasta aleguen que nun son espartanos. Son persones normales que tienen que facer esto pa nun tar baxo'l dominiu d'un dictador", apunta Murro que, en resume, señala que se trata d'una historia con munchos elementos distintos pero contada "col sabor de '300'".