El director del Festival Internacional de Cine de Xixón, Nacho Carballo, negó esti miércoles qu'exista cualquier boicó al certame y que se redactara un manifiestu d'artistes asturianos en contra de la decisión d'escoyer al artista Javier Mariscal pa diseñar el cartel del eventu, que defendió por, ente otres razones, tratase del 50 aniversariu. "El preciu ye maraviyosu de baxu", resaltó.

Carballo, en respuesta a los periodistes tres asistir al actu del Día d'Europa na Casa Natal Jovellanos, destacó que pa Xixón ye un honor que seya Mariscal quien faiga'l cartel. Ello ye que'l diseñador va tar presente na presentación del cartel, que probablemente se faiga'l próximu mes d'ochobre.

Xustificó la elección de Mariscal pol carácter internacional del certame y la proyección mundial que tien l'artista, amás de qu'al ser el 50 aniversariu'l cartel "va quedar pa la historia". Ello ye qu'apuntó que si fuera otra edición, nun habría problema en recurrir a artistes asturianos. Añadió tamién que s'incorpora al certame una estaya de competición de cine d'animación, algo que nun se fizo, anque sí se proyectaren delles películes d'esti xéneru.

Amás, calcó en que dende qu'entamaron a trabayar nel festival, collaboraron con artistes asturianos. Ye más, dixo que "nunca" foi la so intención nun trabayar con artistes asturianos y apuntó qu'él trabayó colos meyores. Atribuyó les noticies apaecíes nesti sen a buscar "una escusa" pa criticar la organización del certame. "Tengo munches coses que facer, bien poco tiempu y nun pueo parame nesi tipu de coses", repostió.

Nun hai boicó

"Nun hai boicó al Festival de Cine de Xixón", repitió antes de confirmar que nun s'alcontrara "nin un solu boicó". Esplicó que la xente cola que se faló son toos profesionales qu'entienden que ye normal nuna democracia que se cambie a les persones que tán al mandu de dellos puestos.

"Nun alcuentro más dificultaes que cualquier eventu cultural que n'época de recortes, por supuesto, tien problemes", dexó claro. Matizó que los problemes que tán alcontrando son los de facer coincidir les feches nes que puean venir directores de cine, por exemplu, pero que son los que supón que tamién tenía l'anterior dirección del certame.

Emir kusturica en xixón

No referente a la programación, señaló que'l próximu día 15 van al Festival de Cannes, onde tán tolos distribuidores cinematográficos y películes, y a la vuelta, el día 25, van facer un avance de la programación. Antes d'eso, el próximu día 14, a les 20.30 hores, presentaráse nel CMI Xixón Sur la película 'Las Nieves del Kilimanjaro', que ye premiu Lux de la Comisión del Parlamentu Européu, con Ignacio Samper y Jesús Rodríguez, que van tar presentes na ciudá.

Adelantó tamién que va presentase muncho primero que'l cartel el logotipu del certame, dao que que va haber actos del 50 aniversariu que tengan llugar antes de la presentación del primeru. A esto añadió que ta confirmao qu'Emir Kusturica va tar el próximu 15 d'agostu en Xixón pa facer un conciertu y un alcuentru col públicu, dientro de los actos de conmemoración del 50 aniversariu del certame.

Remarcó, nesti sen, que tán trabayando en silenciu, que ye como hai que facer les coses na so opinión, y añadió que tán preparando'l meyor festival de cine que se pue. Carballo añadió que nesti día va presentar al Conseyu d'Alministración del teatru Jovellanos les bases del festival a títulu informativu, y insistió en que'l certame va siguir cola mesma llínea que tenía, independiente y de cine d'autor.

Al respecto de la sovención del Ministeriu de Cultura, precisó que nun ye que nun se llograra, sinón que tovía nun ta convocada. Esplicó qu'existen trés festivales nominativos, que son Málaga, Huelva y San Sebastián, a los que se-yos caltién la sovención, mientres que'l restu tienen que presentase a la convocatoria pública del Ministeriu.

Matizó que van recortar a tolos certames, dientro de la política d'austeridá en toles árees, polo que previó que va reducise la partida destinada a Xixón. De la mesma, apuntó que na xunta caltenida col Ministeriu, pudo constatase l'apoyu al festival.