El presidente d'Asturies, Vicente Álvarez Areces, recordó esti xueves a la Universidá d'Uviéu que "non toa demanda pue satisfacese na situación actual", anque entiende'l so pidimientu de más recursos pa tratar el desarrollu del Campus d'Escelencia Internacional (CEI) y l'adaptación al Espaciu Européu d'Educación Superior (EEES).

Asina lo dixo na so intervención mientres la rueda prensa qu'ofreció xunto al rector de la Universidá d'Uviéu, Vicente Gotor; la vicerrectora de Campus d'Escelencia Internacional, Paz Suárez Rendueles; y el conseyeru d'Educación y Ciencia d'Asturies, Herminio Sastre, tres la xunta de la Comisión de Siguimientu del Campus d'Escelencia Internacional.

Areces, que destacó la "unánime reconocencia" al trabayu del equipu rectoral y del conxuntu de la Universidá pa desarrollar el CEI, apostó por sumar esfuerzos p'avanzar nos sos oxetivos d'escelencia investigadora, docente y de tresferencia de conocencia, impulsando la collaboración yá non sólo de la Universidá col Gobiernu, sinón tamién de la institución con otros organismos y el capital priváu, a última hora, con tola sociedá asturiana.

El presidente afirmó que, nesti momentu de crisis, la Universidá ye la sienda fundamental del conocimientu nel que depositar la esperanza del futuru. Por eso, repitió'l compromisu tanto institucional como económicu del Gobiernu d'Asturies, que pese a ver reducíu'l so presupuestu nun 6,7% pa esti exerciciu aumenta un 5% les partíes destinaes a I+D+i.

De la mesma manera, recordó que mientres baxó un 32,6% el númberu d'alumnos nos últimos diez años, la Universidá vio elevase'l so presupuestu nun 75,3% y "la nominativa cubrióse razonablemente".

Areces calcó, tamién, en que los recursos procedentes de la Unión Europea yá nun van destinase, como antes, a infraestructures sinón que se van centrar cada vez más en proyectos d'investigación y desarrollu de la conocencia, nos que considera qu'Asturies y la Universidá d'Uviéu deben y puen competir.

Pal presidente asturianu, toos "tenemos de ser conscientes" de qu'al país tóca-y facer "sacrificios". Asina, resaltó qu'entiende que la Universidá "pide porque precisa más" pero almite qu'Asturies "nun pue dar más" sin empeñase más allá de lo que-y permite la llei.

Respecto al futuru de la Universidá y el llabor de cumplir coles esixencies de grupos reducíos marcaes pol Espaciu Européu, Areces nun cree qu'haya qu'articular númberos clausus. Amás, apunta a la necesidá de complementar la ufierta d'universidaes o comunidaes llenderes, al tiempu que señala que la demanda de titulaciones tien qu'axustase a les necesidaes reales y la situación económica.

Nesti sen, Vicente Gotor dixo qu'esti añu solápense los planes pero afirma que nel futuru va haber árees que nun precisen tanto profesores como agora se piden y, poro, podrán reorganizase recursos p'aquelles otres árees nes que se consolide la demanda. "Lo que ta claro ye la prioridá de la Universidá na calidá de la docencia y la investigación", afirma.

Asina, el rector esplicó que, hasta que nun pasen un par d'años, amás de siguir col plan de xubilaciones y la reordenación de la plantiya, la situación dirá arreglándose en dellos casos cola figura del contratáu doctor, y n'otros casos, "anque a naide présta-y", cola figura del profesor asociáu, al traviés de contrataciones temporales en función de la necesidá docente de cada cursu.