La Xunta Xeneral d'Asturies dio esti vienres el preste a la Llei d'Atención Integral en Materia de Drogues y Bebíes Alcohóliques, qu'eleva de 16 a 18 la edá p'alquirir y consumir alcohol n'Asturies. Fízolo col apoyu de la totalidá de los grupos y dempués del trámite parlamentariu nel que'l testu inicial sufrió dellos cambios, sobremanera no rellacionao col consumu de la sidra.

El conseyeru de Sanidá, Faustino Blanco, foi l'encargáu de defender y presentar la nueva llei que destacó ye frutu del consensu con numberoses asociaciones y contó coles aportaciones d'un equipu multidisciplinar integráu por más de mediu centenar d'espertos de colectivos rellacionaos cola prevención del consumu de drogues y la promoción la salú.

"Tamos ante una llei ambiciosa que busca regular una materia complexo y combatir una zuna social como ye'l consumu d'alcohol y drogues, sobremanera ente los más mozos", dixo Faustino Blanco, qu'animó al restu de grupos a formar parte d'un gran pactu social cola aprobación por unanimidá de la llei.

El testu aprobáu recueye la prohibición de la venta y consumu d'alcohol y drogues a menores de 18 años, anque haya consentimientu paternu. Asina s'establez que la sanción a un menor al que lu garren bebiendo podría llegar a los 600 euros, cantidá que tendrán qu'abonar los padres como responsables. Tamién aumenten les sanciones pa los llocales onde se venda o se dexe beber a menores que puen llegar hasta los 600.000 euros, ya hasta a la clausura del llocal.

La Llei qu'esti vienres aprobóse en sede parlamentaria aprobóse nel Conseyu de Gobiernu en febreru del 2014. Dende aquélla fueron dellos los alderiques al respective y fueron dellos los cambios en trámite parlamentariu, sobremanera en dellos de los aspectos qu'afecten a la promoción y consumu de la sidra.

La norma prohíbe la publicidá de bebíes alcohóliques en cualquier mediu de titularidá pública o moblame urbanu, pero finalmente esti aspectu nun va afectar a la bebida autóctono. Asina, la sidra va poder promocionase cuando cuente con denominación d'orixe o indicación xeográfica protexida, requisitos que cumplen igual la sidra que'l vinu de Cangas.

A estos aspectos modificaos refiriéronse nes sos intervenciones los responsables de los grupos parlamentarios que coincidieron en destacar el consensu llograo nuna materia que toos ellos consideraron de vital importancia. Asina, la diputada socialista, Pilar Alonso, destacó que "toos tienen que felicitase por sacar alantre una llei que'l PSOE asumió como un compromisu nel so programa electoral".

Dende'l PP, Luis Venta Cueli, indicó que siempre ye satisfactoriu aprobar una llei por unanimidá, anque destacó que tuvieron que pasar más de diez años pa qu'una reivindicación del so grupu s'escuchara nel Parlamentu y d'esta manera Asturies dexe de ser una isla na edá de prohibición de venta y consumu d'alcohol y drogues en menores d'edá. Venta Cueli tamién tachó de "chambón" el proyectu de llei inicial del PSOE que tuvo qu'iguase pa la so aprobación.

El diputáu de Foru Asturies, Albano Longo, manifestó na so intervención que la llei llega tarde por culpa del PSOE y ye un exemplu claru d'improvisación y falta de rigor. Sicasí, indicó que'l trámite parlamentariu permitió salvar un proyectu "infumable".

La diputada d'IU, Noemí Martín, destacó que'l verdaderu problema nel consumu d'alcohol nun ye tantu aumentar la edá, como la prevención y la educación. Martín pidió amás que nun se caya nel error de tresmitir el mensaxe de tolerancia con delles bebíes por tratase de bebíes autóctones como la sidra. Pela so parte, el voceru d'UPyD, Ignacio Prendes, felicitóse por poder llegar a acuerdos nestes materies.

Consulta aquí más noticias de Asturias.