Les plantiyes del Real Sporting de Xixón y del Real Uviéu, l'actriz María Cotiello y l'actor William Miller, la cantante Paula Rojo y el cantante Ramón Melendi, los televisivos Camilo Sousa y Xosé Ambás, son delles de les cares conocíes que se prestaron a participar nel proyectu educativu 'El Cantar del vasu', ya disponible n'Internet.

Trátase d'una iniciativa didáctica que naz nes escueles y institutos d'Asturies adaptando'l popular 'Cup Song'. El cantar y la coreografía quieren ser un reflexu de la importancia de la tresmisión interxeneracional pa caltener la llingua asturiana.

Esti vidiu, realizáu pol cineasta Pablo Quiroga, ye una compilación d'esti proyectu durante'l cursu escolar 2013-14 y cuenta cola collaboración de persones y entidaes ayenes al ámbitu educativu que se sumaron a esta iniciativa col oxetivu de que que la llingua asturiana tenga un futuru dignu.

'El Cantar del Vasu' tamién cuenta cola collaboración técnica de músicos como Viti Gutier y Mapi Quintana. Asina como de la Xunta pola Defensa de la Llingua Asturiana, Algamar Producciones, el Claustru de Docentes de Llingua Asturiana y el SNL de Siero.