Medios de comunicación, seguridá ciudadana y empléu son los principales ámbitos de discriminación de la población xitana, según l'Informe Añal de la Fundación Secretariáu Xitanu (FSG), que nesta edición analiza 129 casos rexistraos a lo llargo de 2012, cUasi una ventena menos que na anterior.

Dende esta entidá aportunen en qu'esti recuentu "ye namás una amuesa" de lo qu'asocede en realidá, pues, según la responsable de la área d'Igualdá de FSX, na mayoría de les ocasiones, los xitanos "nun dicen nada", bien porque desconfíen nel sistema, por falta d'entendimientu o bien por resignación.

La metá (49%) de les causes discriminatories correspuenden a medios de comunicación ya Internet, siguíes de los casos de seguridá ciudadana y empléu (10%), educación (9%), bienes y servicios (8%), vivienda (6%) o sanidá (2%). De los 129 incidentes, 42 son individuales y 87 son colectivos.

Nesti informe añal preséntase una contestualización de la discriminación per parte de los medios, que, según esta organización "contribúin bien pocu a qu'esta situación sía superada", yá que na mayoría de les noticies sobre sucesos negativos resáltase la pertenencia a la etnia xitana. Tamién alvierte sobre determinaos programes televisivos que tresmiten una imaxe "estereotipada" del colectivu.

Internet y les redes sociales convirtiéronse nun escenariu nel que se axunten a esta minoría con prexuicios, y onde, amás, trespásase la barrera de la discriminación hacia comportamientos, que, a xuiciu de FSX, son "bien esmolecedores". Asina, sollerta sobre la "xitanofobia y la medría del odiu".

El documentu llama l'atención sobre les identificaciones policiales por perfil étnicu y recuerda un informe publicáu por esta fundación en 2013 que constata que los xitanos son el grupu social más identificáu por razones étniques, pues la mayoría de los encuestaos (60%) manifestaben ser identificaes y cuasi un 40% paraos y rexistraos cuando diben nos sos vehículos.

Llei de seguridá ciudadana

"Esiste una situación de tratu desigual ensin resolver", manifestó la responsable d'Igualdá d'esta organización, al referise a determinaes actuaciones policiales na identificación de posibles culpables de delitos o la intimidación a menores y families. Nesti ámbitu, sorrayó que la Llei pa la Protección de la Seguridá Ciudadana, que s'atopa en fase d'anteproyectu, tendría de prohibir "espresamente" estes actuaciones.

Tamién sollertó sobre'l tratu d'axentes de seguridá privada en centros comerciales hacia muyeres xitanes al "presuponer" que van cometer un delitu y les persiguen nestos espacios.

Magar l'informe pon de manifiestu que s'avanzó nos últimos años en cuanto al tratu desigual d'esta minoría respecto al restu de la población, tamién alvierte de qu'estos pasos contra la discriminación danse más nel ámbitu formal y xurídicu que na práctica.

El riesgu de la discriminación de baxa intensidá

El director de FSX, Isidro Rodríguez, sorrayó que n'España hai una discriminación "de baxa intensidá", que tien "munchos riesgos" pola tolerancia" qu'hai escontra ella y l'amenaza de que nun momentu dáu puede convertise en discriminación violenta d'alta intensidá", como ta asocediendo en dellos países europeos. "Nun podemos relaxanos", indicó.

Na mesma llinia, Giménez incidió nel "precuru" pa que el "antixitanisuo" que se ta dando n'otros países, fomentáu por formaciones polítiques d'estrema derecha "nun entre n'España". Coles mesmes, afirmó que nel ámbitu xurídicu tendría d'abanderar la defensa de la igualdá racial, de la qu'aseguró que la xurisprudencia nesti ámbitu ye "cuasi nula" y les víctimes nun son desquitaes.

Organismu independiente pa la igualdá de tratu

Ente los encamientos d'esti informe, la responsable d'Igualdá de la fundación apunta a la creación d'un organismu d'independiente que promueva la igualdá de tratu, en cumplimientu d'una directiva de la Unión Europea, la meyora de los calces procesales na defensa de la non discriminación, protocolos coordinaos ente cuerpos policiales, fiscales y xulgaos, formación y sensibilización, y evitar la indolencia ante discursos políticos discriminatorios.

Tamién propón l'establecimientu de midíes sancionadores pa correxir comportamientos discriminatorios naquellos casos en que sía necesariu. Trátase d'una midida alministrativa que, según FSX, aplicase en dellos países europeos pa tratar la defensa de la non discriminación.