La Sala Civil y Penal del Tribunal Superior de Xusticia d'Asturies n'Autu del 8 d'abril del 2013 ordenó entamar dilixencies previes y dar treslláu de la documentación recibida del Conceyu de Cuideiru, en relación cola contratación de policíes llocales mientres el periodu 2003-2008 al Ministeriu Fiscal, al entender que, de la mesma, podía entendese de forma indiciaria la comisión d'un delitu siguíu de prevaricación atribuyíu al diputáu rexonal, Francisco González Méndez, cuando exercía como alcalde del Conceyu de Cuideiru.

Una vez recibíu l'informe fiscal correspondiente, qu'entiende que los fechos puestos na so conocencia pola Sala puen ser efectivamente constitutivos d'un delitu de prevaricación, y nel qu'amás solicita determinaes dilixencies, ente les que s'alcuentra la declaración como imputáu del agora diputáu rexonal, el maxistráu instructor, atendiendo a la so solicitú, acordó citar en calidá d'imputáu a Francisco González Méndez, el próximu día 14 de mayu a les 10.30 hores na sede del TSXA.

Esta pieza separada ye consecuencia de la documentación requerida pol maxistráu instructor nel cursu de les dilixencies d'investigación abiertes, amás de la querella por un presuntu delitu de sobornu o exacciones illegales, interpuesta pol sarxentu de la Policía Llocal y dellos hosteleros del conceyu, qu'esplotaben mientres la temporada braniega unos chiringos ubicaos nel puertu pixuetu.

La instrucción por exacciones illegales, alcuéntrase nesti momentu na fase entemedia del procedimientu, al convocase pal día 7 de mayu a les 12.00 hores, l'audiencia preliminar a la decisión d'abertura de xuiciu oral ante'l Tribunal del Xuráu, según informó'l Tribunal Superior de Xusticia d'Asturies (TSXA).