El ministru de Finances alemán, Wolfgang Schaeuble, aseguró qu'Alemaña nun quería imponer una quita nos depósitos de los aforradores, pero que'l Gobiernu de Xipre, la Comisión Europea y el Bancu Central Européu (BCE) mostráronse en contra d'esta opción.

"La posición del Gobiernu alemán y del Fondu Monetariu Internacional (FMI) ye qu'una parte considerable de los fondos necesarios pa la reestructuración de los bancos la facilitaren los propietarios de les entidaes y los inversores", argumentó mientres una entrevista concedida a la cadena de televisión pública xermana ARD.

"Evidentemente, respetaríamos la garantía de depósitu pa cuentes superiores a los 100.000 euros, pero'l Gobiernu xipriota, la comisión y el BCE optaron por esta decisión, qu'agora han esplicar al pueblu xipriota", remachó.

En base al acuerdu anunciáu na madrugada del sábadu pol Eurogrupu, el costu del rescate estimóse nun máximu de 10.000 millones d'euros.

Ente les condiciones acordaes figura introducir una tasa del 6,75 por cientu sobre los depósitos d'hasta 100.000 euros y del 9,9 por cientu nos depósitos penriba d'esa cantidá, una midida cola que Nicosia espera recaudar 5.800 millones d'euros. Amás, va aumentar del 10 al 12,5 por cientu l'impuestu de sociedaes.

L'anunciu del acuerdu provocó que miles de persones dirixéronse a los bancos del país pa retirar los sos aforros, primero que se ficiera efectiva la midida, pero les entidaes prohibieron, por orde de les autoridaes, les tresferencies bancaries y el restu d'operaciones vinculaes.

El refugu provocáu pola midida provocó que'l Gobiernu xipriota volviera sentase na mesa de negociaciones cola 'troika' —Unión Europea, BCE y FMI— pa llograr una reducción del porcentaxe de la quita de les cuentes bancaries xipriotes.

En concreto, Xipre pide que se rebaxe del 6,75 al 3 por cientu la quita a les cuentes de menos de 100.000 euros, y elévense del 9,9 al 12,5 por cientu pa les de más de 100.000 euros, según una fonte cercana a los contactos citada pola axencia Reuters.