El presidente de Foru Asturies, Francisco Álvarez-Cascos, afirmó esti llunes en Xixón sobre Suzuki que'l so partíu "nun va convalidar la razón de la deslloalización pa esplicar el zarru de sutrucu de la planta de Xixón de Suzuki", y avanzó que van investigar tanto nel Gobiernu como nel Gobiernu central los motivos reales que, según él, caltiénense "tapecíos".

Cascos, en declaraciones a los medios de comunicación tres reunise col Comité d'Empresa na sede xixonesa de Foru, dixo querer saber qué se faló nel alcuentru calteníu ente'l presidente rexonal, Javier Fernández, y el presidente de Suzuki, tres el que se supo del zarru irreversible de la planta programáu pal 31 de marzu d'esti añu.

Ye más, indicó que Foru trabaya dende entós pa intentar desvelar los datos que na xunta se trataron, de la qu'apuntó que se reserva la presentación d'iniciatives parlamentaries nacionales nos ministerios de Facienda y d'Industria, asina como nel Gobiernu asturianu, pa tratar de llograr "más información y más precisa sobre les razones fondes de la decisión qu'adoptó Suzuki".

"Creo que podía tener otres causes d'otru tipu d'intereses", insistrió, sobre les razones del zarru. Por eso, el Grupu Parlamentariu de Foru resérvase la oportunidá d'estudiar "el poder investigar a fondu les causes y les razones" poles que s'adoptó la decisión, especialmente porque se trata d'una empresa que bate récores de beneficios añales.

Según los sos barruntos y la información de la que dispón, la decisión de dexar de fabricar en Xixón nun ye porque se faiga más caru que n'otros sitios, sinón "por razones de conveniencia", polo que vio necesario afondar nello.

Motivos escondíos

"Puede haber razones de conveniencia non puramente oxetives de costos diferenciales qu'aconseyen a una empresa, poles mesmes razones que nel so día vieno a España, dexar de tar n'España", apuntó. Remarcó que nun-y prestaría tar nel grupu de los que por nun estudiar a fondu eses razones, "faigan de pininos y crean el mensaxe de la desllocalización cuando equí lo qu'hai son otres razones d'oportunidá que se caltienen escondíes y que los responsables políticos tenemos la obligación d'intentar investigar y desvelar", aseguró.

Sobre'l que se-y puea esixir devolver les ayudes públiques, dexó claro que si se demuestra qu'incumplió un compromisu y la llei lo contempla, "nun hai escepciones", repostió.

Unío a ello, criticó la falta d'apoyu de los gobiernos central y autonómico y vinculó la 'marxinalidá' d'Asturies per parte del Executivu central la falta de voluntá d'ésti pa intentar buscar una solución ante l'anunciu de zarru de la planta xixonesa. Una 'marxinalidá' que fai que la "decadencia" d'Asturies seya mayor que la d'España o munchos otros llugares del país.

Tamién vio "irracional" que'l Principáu nun quiera recibir nin al Comité d'Empresa de Suzuki nin de nenguna otra factoría. Consideró que namás col Gobiernu rexonal empezara a recibir a los Comités de les empreses, Asturies entamaría una etapa de cambios. Nesti sen, opinó que'l Gobiernu autonómicu tien "munchos resortes" y competencies nos ámbitos llaborales y de promoción de la industria pa poder ayudar a arreglar el problema.

Comprometióse, coles mesmes, la collaboración institucional de Foru, a nivel parlamentariu o del Grupu Municipal, a la hora de buscar una solución que caltenga la producción na planta xixonesa con un nuevu inversor.

Cascos esclaró que Foru pue ayudar, pero nun suplantar al Conceyu, anque indicó que sí puen participar en misiones comerciales y mostrar les potencialidaes de la planta xixonesa pa collaborar en convencer a un posible inversor.