El profesor Xosé Lluis García Arias abrirá esti martes el XXXI Xornaes Internacionales d'Estudiu de la Llingua Asturiana, entamaes pola Academia de la Llingua y la Universidá d'Uviéu, con una conferencia sobre 'Conciencia llingüística y testos medievales nel Dominiu Ástur'.

Anteriormente, a les 16.00 hores nel salón d'actos de la Facultá de Filosofía y Lletres, el rector de la Universidá d'Uviéu Vicente Gotor inaugurará les XXXI Xornaes. El actu contará cola presencia de la Decana de la Facultá de Filosofía y Lletres, Cristina Valdés Rodríguez, y de la Presidenta de l'Academia de la Llingua Asturiana, Ana María Cano González.

Les Xornaes celebraránse los díes 6, 7, y 8 de payares del 2012, y nelles participarán un bon númberu de profesores ya investigadores asturianos xunto con otros de distintes universidaes españoles y europees.

Nesta primer xornada, amás de la la conferencia inaugural, a cargu d'Arias, tamién habrá delles comunicaciones y de les ponencies La entonación asturiana nel marcu de les llingües romániques, de la profesora de la Universidá d'Uviéu Carmen Muñiz Cachón, y "Abril buenu era si el gallegu non viniera". Distribución geoparemiológica de refranes meteorológicos a cargu del profesor de la Universidá de Lisboa, Xosé Afonso Álvarez Pérez.

La sesión acabará coles presentaciones de la edición dixital del númberu 107 de la revista Lletres Asturianes y la d'un nuevu númberu de la revista Ciencies. Cartafueyos Asturianos de Ciencia y Teunoloxía que cuntará cola presencia de la Vicerrectora d'Investigación y Campus d'Escelencia Internacional de la Universidá d'Uviéu, María Paz Suárez Rendueles.