El presidente del Comité d'Empresa de la Fábrica d'Armás de La Vega, n'Uviéu, Mariano Fernández, dio por "perdida la batalla", nel conflictu orixináu tres l'anunciu de treslláu de les instalaciones a la factoría de Trubia, per parte de la empresa General Dynamics. Amás, culpa a los representantes políticos, dende l'alcalde d'Uviéu, Agustín Iglesias Caunedo, hasta'l presidente del Gobiernu asturianu, Javier Fernández, pasando pel delegáu de Gobiernu, Gabino de Lorenzo, por nun torgar esta decisión. "O mos engañaron o son unos inútiles", señala.

Nuna rueda prensa, acompañáu pol secretariu d'Organización de MCA-UXT na fábrica, Jesús María López, Fernández ofreció una rueda prensa na que se mostró especialmente críticu colos representantes políticos.

El representante sindical consideró yá'l treslláu "un fechu", porque "a la vuelta de les vacaciones, en septiembre, el 80% de la plantiya va tar trabayando en Trubia", y el 1 de payares "nun va quedar nin un solu trabayador en La Vega".

Sicasí, afirma que'l "supuestu" treslláu "va ser de personal, pero non de maquinaria", pues "al ritmu que se ta llevando ye imposible que se cumplan plazos". Recuerda amás qu'hai máquines de precisión "que nun se tán treslladando de manera correcta, si se pretende que tean operatives en Trubia".

"defraudaos" colos políticos

Afirma que los trabayadores siéntense "defraudaos". "Nun entendemos, si de verdá había un consensu de toles fuerces polítiques, qu'una empresa con tanto calao políticu como Xeneral Dynamics tome esta decisión", señala, pa recordar de siguío que los contratos precisen autorización del Gobiernu.

Recuerda amás que l'anterior intentu de treslláu, va trés años, torgóse precisamente pola oposición de los grupos políticos. "O mos engañaron o son unos inútiles", señala'l presidente del Comité.

Afirma que los apoyaron "namás de boca", y repasa algunos de los nomes a los que dirixe la so crítica: l'alcalde d'Uviéu, Agustín Iglesias Caunedo, al que recuerda que tanto'l Ministeriu de Defensa como la empresa van ponese en contactu con él pronto; a los diputaos de la Xunta Xeneral, pues alvirtiéndolos de la urxencia nel tiempu d'un posicionamientu políticu claru en defensa del patrimoniu industrial, somorguiáronse nun debate parlamentariu sobre La Vega cuando la empresa yá taba executando l'esmantelamientu de la Fábrica"; el conseyeru d'Industria y Empléu, Graciano Torre, "que va tener el duosu honor de ver reflexada nel so currículum políticu la desapaición del sector aeronáuticu y la del sector armamentísticu"; al delegáu de Gobiernu, Gabino de Lorenzo, al que reprocha que nel so día se posicionara "firmemente" sobre La Vega, y agora "va firmar" el vistu bonu definitivu al treslláu; y al ministru d'Industria, pues "nun periodu non mui llargu vamos poder ser testigos de la subida de los presupuestos de Defensa y namás va quedanos llamentanos d'otra oportunidá perdida".