El presidente de la Federación Asturiana de Conceyos (FACC), Antonio de Luis Solar, anunció yá una próxima subida xeneral de les tases y tributos municipales, de resultes de la subida del IVA qu'anunció'l Gobiernu central.

Nuna rueda prensa convocada pa informar de la posición de la FACC ante l'asamblea de la Federación Española de Conceyos y Provincies (FEMP), a Solar preguntáron-y por esti asuntu.

"Ye un gastu añadíu que va ser irreversible", señaló De Luis, p'añadir que "va haber que tocalo nes próximes reformes y ordenances fiscales". "Vamos Tener que reformalos a l'alza, teniendo en cuenta que los costos de los servicios van subir pol IVA", señaló'l presidente de la FACC, esclarando que "los Conceyos nun somos como los empresarios que recuperen l'IVA nes operaciones de compra y venta, nós nun lu recuperamos, polo tanto son subíes netes de los costos de los servicios qu'emprestamos".

Refugó tamién la posibilidá de negociar esti asuntu col Gobiernu central, porque "la midida ta aprobada". Considérala, sicasí, "una incidencia grave".

Recordó amás que "los conceyos qu'optaron al fondu pal pagu a proveedores tán asumiendo un costu financieru d'hasta'l 5,9%", lo cual "implica un esfuerzu añadíu".

Non a la retirada de competencies

De Luis calcó la posición de la FACC contraria a la propuesta de la retirada de competencies y servicios a conceyos con menos de 20.000 habitantes en favor de diputaciones o autonomíes, formulada pol Gobiernu central. Una midida que, según el presidente de la FACC, afectaría a la inmensa mayoría de los conceyos asturianos.

De Luis mostróse favorable a "respetar l'autonomía municipal", l'Alministración, recordó, "más antigua, la más consolidada y la más cercana al ciudadanu". "Les dificultaes económiques nun puen ser la escusa pa esmantelala", alvirtió.

Dende'l so puntu de vista, la propuesta del Gobiernu, igual que la de la reducción del 30% de conceyales, "nun tien sen de nenguna manera", porque nun supondría un aforru considerable. Al so xuiciu, la reforma de les alministraciones llocales ha pasar pela redefinicición de les sos competencies, la optimización de recursos y l'afayadiza financiación.

Non a la fusión de conceyos n'ASTURIES

Preguntáu polos periodistes, y anque la reforma plantegada pol Gobiernu nun contempla tal escenariu, tamién refugó la fusión o desapaición de conceyos pequeños, como puean ser los de Tameza, o'l d'Illas (ante una posible fusión col de Castrillón).

"La desapaición d'un Conceyu nun significa un aforru sustancial", señaló, recordando que los conceyos pequeños suelen contar con ún o dos funcionarios". En tou casu, la FACC apoyaría que se compartieren determinaos servicios, matizando qu'ello tampoco conllevaría un aforru en personal, porque'l serviciu habría que siguir emprestándolu.

Al so xuiciu, Asturies precisa la so actual composición municipal. "La existencia d'estos conceyos ye fundamental pa caltener la vida nellos y los servicios qu'empresten", señaló Antonio De Luis Solar.