El Gobiernu d'Asturies señaló que'l próximu miércoles, día 4 de xunetu, ta previsto que puea abrise la Ruta'l Cares, na zona de La Madama de la Huertona, en Cabrales, onde se produxo un fundimientu'l pasáu mes d'abril, según informa la dirección del Parque Nacional de Picos d'Europa.

Esta reabertura, si nun asocede nengún imprevistu, va facese compatibilizando'l pasu de los senderistes con ciertos trabayos de remate, como la ubicación del tramex metálicu nuna parte del anchu del tramu central de la pasarela, que va permitir tener una visión del vacíu dende la mesma; la ubicación de la malla de protección contra cayida de piedres nel panal vertical o la retirada de la estructura auxiliar que permitió'l montaxe de la pasarela.

La presencia de personal de la obra va garantizar la seguridá y va regular el pasu de los senderistes con breves interrupciones puntuales del tránsitu.

D'esta manera, esta complicada obra, oxetu de declaración d'emerxencia per parte de la Presidencia del Consorciu Interautonómicu pa la Xestión Coordinada del Parque Nacional de los Picos d'Europa, remataríase nun plazu inferior a los trés meses previstos.

Un argayu de roques

Hai que recordar que'l pasáu 17 d'abril, nel citáu tramu de la Ruta'l Cares, en Cabrales, bien cercanu a la llenda cola provincia de Lleón, dientro del Parque Nacional de los Picos d'Europa, rexistróse un argayu de roques qu'implicó la interrupción total del tránsitu ente ambos estremos de la ruta. El reconocimientu del estáu d'execución de les obres llevólu a cabu'l director del Parque Nacional, el director d'obra y el responsable de los trabayos per parte de Tragsa, que foi la empresa executante de la obra.

La obra, que s'alcuentra na so fase final d'execución, superó importantes dificultaes, derivaes de lo apartao del llugar nel que se rexistró'l fundimientu, lo que requirió del tresporte de maquinaria y materiales con helicópteru, cuando se dispunxo d'esti mediu, y con caballeríes.