L'acusáu de la muerte de Johana Elizabeth Toaza Sarmiento, en septiembre del 2010, asumió esti xueves el pidimientu de condena del Fiscal Delegáu de Violencia de Xéneru y Doméstica d'Asturies, Gabriel Bernal, y aceptó 21 años y mediu de prisión por un delitu d'asesinatu con alevosía y otru de daños por incendiu, según informó la Fiscalía.

Asina, J. G. M. C., nacíu n'abril de 1983, reconoció un delitu d'asesinatu previstu y penáu nel artículu 139.1 del Códigu Penal (asesinatu con alevosía), y un delitu de daños por incendiu del 266, en relación col 263, ambos del Códigu Penal, dao que tamién taba acusáu de prender fueu a la vivienda onde residía la víctima. Sobre'l delitu d'asesinatu, dase la circunstancia agravante de parentescu, dao qu'él y la finada calteníen una relación sentimental.

Pol delitu d'asesinatu, l'acusáu asumió la condena que solicitaba pa él el Ministeriu Fiscal, de 20 años de prisión. Pol delitu de daños por incnediu, almitió un añu y seis meses de prisión.

En conceptu de responsabilidá civil, l'acusáu aceptó'l pagu d'una indemnización de 150.000 euros a caún de los dos fíos de la víctima polos daños morales derivaos de la perda de la so madre (esto ye, un total de 300.000 euros), y de 9.686 euros al padre de la finada, tal como solicitaba l'acusación particular. A los trés propietarios del inmueble onde asocedieron los fechos, y que sufrió desperfectos pol incendiu, l'acusáu va abonar 7.362,44 euros polos daños causaos.