Alberto Arce va siguir ocupando'l puestu de Lletráu Mayor na Xunta Xeneral del Principáu d'Asturies, igual que nes últimes dos llexislatures. Asina lo decidió la Mesa de la Xunta Xeneral en xunta d'esti martes, que procedió al so nomamientu.

"Ye una persona con acreditada capacidá técnica y esperiencia profesional", señaló'l presidente de la Cámara, Pedro Sanjurjo, que recordó qu'Arce lleva trabayando na Xunta dende hai 26 años.

La Mesa tamién acordó dexar desierta una plaza de lletráu del parlamentu asturianu. Según esplicó Sanjurjo, presentáronse delles persones pero, a xuiciu del xuráu, nun acreditaron les conocencies necesaries. Asina la plaza quedó desierta, "en previsión de que nel futuru vuelva salir a convocatoria pública", comentó Sanjurjo.