El voceru socialista na Xunta de Xeneral d'Asturies y númberu dos pola circunscripción central, Fernando Lastra, reprochó al Gobiernu d'Asturies (Foru) que cree alarma sobre la utilidá de la regasificadora y que la rectificación posterior nun la arregle. Según él, diga lo que diga'l Gobiernu de Foru, ye "incompetente y incoherente".

Ye más, apuntó que les manifestaciones del conseyeru d'Economía, José Manuel Rivero, sobre esti asuntu, ponen a Foru en sintonía colo que mos tien avezaos el PP, n'Asturies y n'España, al recordar que foi con un Gobiernu del PSOE cuando se vio la conveniencia y importancia d'esta infraestructura enerxética. Asina lo apuntó en rueda prensa nel Conceyu xixonés, tres reunise col voceru municipal socialista, Santiago Martínez Argüelles.

Lastra mostró les sos dudes sobre a qué versión acoyese, si a la de Rivero o a la posterior del presidente de l'Autoridá Portuaria de Xixón, Emilio Menéndez, del que dixo que la so credibilidá ta "baxo mínimos", especialmente por 'atacar' a la Comisión Nacional d'Enerxía (CNE), al tiempu que refugó que seya "un ñeru de socialistes", como-y atribuyó'l responsable portuariu.

Calcó, tamién, en que los argumentos sobre la escasa utilidá de la regasificadora usaos por Foru son "erróneos", dao que nun tien que ver colos costos, que se repercuten nel conxuntu del sistema. Preguntóse, nesti casu, si ye meyor que pagaren los asturianos la factura y los tráficos quedáraselos el Ferrol, por exemplu.

Unío a ello, insistió en que si lo que cree Foru que nun ye importante yá ye'l reforzar l'autonomía enerxética d'Asturies o la diversificación de les fontes de suministru del gas, proveniente na so mayoría d'Arxelia y Exiptu. Nesta llinia, calcó en que si va ser que piensen que dexó de ser una enerxía reserva dientro del mix enerxéticu. Lastra destacó que'l Puertu tien técnicos "bien competentes", polo que la incompetencia ye de la estratexa directiva.

No referente a la venta de patrimoniu públicu de l'Autoridá Portuaria, encamentó tener cuidáu "con vender les xoyes de la güela" pa saniar el déficit d'El Musel, dao que pue tener problemes a futuru. Recordó les repercusiones nel so "día de la fiebre" del ex presidente José María Aznar de vender empreses públiques, polo que remarcó que va haber qu'analizar casu a casu. OXETIVU:

Desprestixar al psoe

Argüelles, pela so parte, criticó'l despropósitu portuariu de primer nivel" de les últimes selmanes, que fizo, al so xuiciu, "muncho dañu" a la integridá del Puertu. Aludió al tracamundiu qu'hai, tanto sobre les perdes del 2011, la subida de tases o a la situación real d'El Musel.

El conceyal aseguró que Foru nun tien "nengún empache" en perxudicar a les instituciones, el Puertu o les empreses asturianes, con tal de desprestixar al PSOE, y acusólu de xugar con miles de puestos de trabayu sin tener reparu nel costu qu'esi oxetivu políticu conlleva.

Coles mesmes, pidió responsabilidaes al presidente portuariu, a l'alcaldesa xixonesa, Carmen Moriyón, y a Puertos del Estáu, al tiempu qu'encamentó al PP qu'escueya si quier ser cómpliz d'esi despropósitu o si quier contribuyir a escamplar el futuru del Puertu y la industria asturiana.