La macroencuesta del Centru d'Investigaciones Sociolóxiques (CIS) pa les elecciones xenerales del 20 de payares otorga n'Asturies trés diputaos al PP y trés al PSOE, mientres que Foru Asturies y IU-Los Verdes llograríen un diputáu caún. La Comunidá cuenta con ocho diputaos nel Congresu.

El sondéu, dau a conocer esti vienres, reflexa que n'Asturies realizáronse encuestes en 25 conceyos a 357 persones. El marxe d'error de la encuesta ye de 5,29 por cientu nuna ponderación de 1,280.

La macroencuesta nun ofrez porcentaxes de votos a los partíos asturianos. A nivel nacional otorga la victoria al PP con un 46,60 por cientu y ente 190 y 195 escaños, una mayoría absoluta tovía mayor que la que llogró José María Aznar nel 2000, y dexa al PSOE con ente 116 y 121 diputaos y un apoyu del 29,91 por cientu, el so peor datu de los últimos trenta años.

A la pregunta de qué partíu gustaría-y que ganara les elecciones, los encuestaos escoyeron con un 33,5 por cientu al PP mientres qu'un 21,7 apuesta pol PSOE. Izquierda Unida tien un 5,3 por cientu y Foru de Ciudadanos el 2 por cientu.

A la pregunta del recuerdu de votu nos pasaos comicios, el 30.2 por cientu de los encuestaos apostó pol PP; el 29,7 pol PSOE; el 6 por cientu por FAC y el 4,4 por cientu por IU.

Pela so parte, el 30,5 por cientu de los encuestaos votaríen al PP nel casu de celebrase mañana les elecciones; un 17,9 por cientu al PSOE; un 4,5 por cientu a IU y un 2 por cientu a FAC. Por simpatía, el 33,4 por cientu apostó pol PP; el 24,9 por cientu al PSOE; el 6,5 por cientu a IU y el 2 por cientu a FAC.