El presidente del Gobiernu asturianu, Francisco Álvarez-Cascos (Foro Asturies), dixo esti vienres que'l so Executivu nun va llevar a cabu'l llabor d'ellaborar un proyectu de presupuestos rexonales pal 2012 hasta contar con "previsiones solventes", del nuevu Gobiernu que va surdir tres el 20 de payares, en relación a los presupuestos xenerales del estáu (PXE) y, poro, les tresferencies que va ingresar la comunidá. "Namás asina vamos poder tratar con responsabilidá, sin crear un furacu presupuestariu, la formulación d'un proyectu de presupuestos rexonales", dixo.

Cascos pronuncióse nestos términos na so respuesta, nel Plenu d'esti vienres, a una pregunta d'un diputáu del so partíu, Enrique Álvarez Sostres, sobre les consecuencies de l'ausencia de Presupuestos Xenerales del Estáu.

El presidente asturianu dixo que les previsiones macroeconómiques qu'existen sobre lo qu'ingresaría'l Gobiernu asturianu de tresferencies del Estáu "quedaron superaes" y afirmó que nun tendría sen facer unes cuentes basándose nesos datos. "Han entendese absolutamente inadecuaes les cantidaes estimaes comunicaes al Gobiernu d'Asturies nel mes d'agostu d'esti añu".

Cascos resaltó'l pesu que tien nos presupuestos rexonales les tresferencies que provienen del Estáu y que tán reflexaes nos presupuestos xenerales. Nesti momentu suponen un 72,7 por cientu (59 por cientu procedente del sistema de financiación y un 13 per cientu procedente de tresferencies sectoriales).