La Federación Asturiana d'Empresarios, FADE, negó esti llunes estratexa alguna de dilación per parte de les empreses, como afirmen dellos representantes sindicales no que la negociación colectiva se refier y aseguró que "toles cifres apunten a un desarrollu normal de la mesma".

Al traviés d'un comunicáu la patronal asturiana destacó que según datos de la Dirección Xeneral de Trabayu d'Asturies, con fecha de xunu del 2011 —últimu datu disponible—, soscribiérense 23 convenios. Nel mesmu períodu del 2010 soscribiéresen 22 convenios, lo qu'a xuiciu de FADE acredita la homoxeneidá de los datos.

Nesti sen esplicó qu'a la fecha, el gruesu de los convenios en negociación son los ocho convenios de sector que tán axustándose nesti momentu, al terminar la so vixencia pactada'l 31 d'avientu pasáu.

"Ye estadísticamente normal y ta dientro de la dinámica habitual de negociación el que tovía nun se firmaron. Hai que tener en cuenta que nel añu 2009 algamóse una media de 387 díes de negociación, cifra tovía bastante alloñada. En tou casu, y por cuenta de la ultraactividá, dichos convenios siguen aplicándose con toa normalidá", destacaron dende FADE.

Por ello manifestaron que, frente a lo qu'afirmen dellos representantes sindicales, nun cabe deducir d'estos datos nenguna estratexa de dilación per parte de les empreses, que nun seyan les dificultaes propies de llograr acuerdos nuna situación económicamente tan difícil pa la sobrevivencia de munches compañíes.