La secretaria xeneral del PP, María Dolores de Cospedal, aseguró que les declaraciones de la presidenta de la Comunidá de Madrid, Esperanza Aguirre, en favor del ex ministru Francisco Álvarez-Cascos son "una opinión particular" y añadió que, con esta escepción", tol PP va apoyar "de manera entusiasta" a la candidata del PP por Asturies, Isabel Pérez-Espinosa. Amás, aprovechó pa recordar a Aguirre qu'ella nun pertenez al órganu del partíu encargáu de decidir quién van ser los númberos 'ún' nes Comunidaes Autónomes.

Aguirre reveló esti llunes nuna entrevista radiofónica que nun va facer campaña por Pérez-Espinosa y añadió que Cascos "ye'l meyor candidatu" que'l Partíu Popular podría presentar por Asturies. Ello ye que dixo qu'hasta'l 29 de marzu hai tiempu pa igualo.

Nuna rueda prensa na sede nacional del PP, Cospedal enmarcó nel planu de la opinión personal les palabres d'Aguirre sobre "quién ye o non el meyor candidatu pa una comunidá determinada, qu'amás nun ye la Comunidá de Madrid". "Ye una opinión particular. Cierto ye que ye la presidenta del PP de Madrid y de la Comunidá de Madrid, pero tamién ye verdá que nun participa nos órganos del partíu que tienen que tomar eses decisiones".

De la mesma manera, el 'númberu dos' del Partíu Popular añadió que, "con esa escepción" d'Aguirre, la dirección nacional y tolos miembros del PP en toa España van apoyar de "manera entusiasta" a Pérez-Espinosa porque, según calcó, el partíu cree nella y ye la candidata del Partíu Popular.

N'asegurando que nun faló con Aguirre d'esti estremu, señaló en que "una cosa son opiniones personales sobre una candidatura, y otra ye'l programa nacional y autonómicu del PP en Madrid o n'Asturies". El PP, prosiguió, va presentar la so alternativa al PSOE "pa un meyor Gobiernu n'Asturies".

Al pregunta-y si consideraba desafortunaes les declaraciones d'Aguirre, respondió que nun diba interpretar eses palabres "más allá" de lo que dixera. "Pue tener una opinión particular y lo repesto muncho, pero nun ye la mía nin la de de la inmensa mayoría del PP de toa España", calcó.

Ante les manifestaciones de la presidenta de la Comunidá de Madrid asegurando qy'espera que la situación s'igüe porque Cascos ye'l "meyor candidatu", Cospedal recordó que nel PP ta "tou aquél que quiera tar" y "el que nun ta ye porque nun quier tar".

Eso sí, de siguío destacó que "francamente" nun creía qu'Aguirre quisiera dicir güei que ta "faciendo campaña por otru partíu" que nun seya'l PP. "Yo nun creo que tea faciendo campaña por otru partíu", repitió, en referencia al 'Foro Asturias', la formación que rexistraron los siguidores de Cascos.

Cascos "yá nun pertenez al pp

En cuanto al espediente informativu que'l Comité de Disciplina abrió nel so día a Álvarez-Cascos y a miembros del PP asturianu pol so encruz d'insultos, indicó que l'ex ministru de Fomentu "yá nun pertenez" al so partíu y que, poro, el PP "nun tien xurisdicción alguna" p'actuar contra él disciplinariamente.

Preguntada si podría abrir espediente a Aguirre poles sos palabres, Cospedal volvió calcar en que ye una opinión personal y que'l PP tomó la decisión de la candidatura por Asturies "al traviés de los órganos del partíu que tomen eses decisiones", como establecen los Estatutos del Partíu Popular. "Somos un partíu arrogante, pero quien nun quier tar con nós, nun ta", acabó.