La conseyera d'Educación, Cultura y Deporte, Ana González, aseguró esti xueves que nel casu de que l'Estáu indique que les competencies son de calter autonómico, Asturies va exercer la so competencia y va regular la especialidá de profesoráu d'asturiano. González envió una carta al subsecretariu d'Estáu d'Educación, Cultura y Deporte, Fernando Benzo, na qu'encamienta al Ministeriu dirixíu por José Ignacio Wert a que-y indique en qué normativa se recueye que nun procede la creación de la especialidá de profesoráu d'asturianu.

Nun comunicáu de prensa, González recordó que'l ministru comunicó a la Conseyería'l pasáu ochobre que "dao que la llingua bable nun ta reconocida como llingua coofial nel Estatutu d'Autonomía del Principáu d'Asturies nun procede la creación como especialidá de profesoráu d'Educación Primaria y Secundaria".

La conseyera d'educación solicitó na carta al Subsecretariu qu'indique qué llexislación ye la que torga crear la especialidá d'una llingua tradicional que forma parte del currículu d'una Comunidá Autónoma, cuando "coles mesmes reconócense les especialidaes d'otres llingües como'l francés o'l llatín que nun son oficiales o cooficiales nel estáu español".

Amás, nel escritu de la Conseyería pidióse al Gobiernu central que notifique al Gobiernu asturianu qué normativa pue aplicase pa executalo nel casu de que'l Ministeriu asegure que nun entra dientro de les sos competencies el desarrollu de la especialidá. Ana González aseguró na misiva que si hai fundamentos de derechu que permitan "la posibilidá" de reconocer la especialidá per parte del Principáu, "esta Comunidá exercerálos".