Los diputaos na Xunta Xeneral María Judit Flórez Parés (PSOE), Noemí Martín (Izquierda Unida) y Ignacio Prendes (UPyD) espresaron esti vienres la so preocupación ante "les torgues", en palabres d'esti último, que'l director, Esteban Suárez, de la prisión de Villabona ta poniendo al funcionamientu de la Unidá Terapéutica y Educativa (UTE). Presentaron una proposición pa esixir la continuidá d'esta actividá.

Los trés ofrecieron una rueda de prensa pa esponer los motivos d'esta propuesta que faen a la Mesa de la Xunta Xeneral, con cuenta de facilitar y garantizar dende la cámara parlamentaria autonómica l'actividá d'esti centru. El mesmu funciona dende 1992 vinculáu a la prisión asturiana, al que se deriven internos afectaos de drogodependencies pa la so reintegración social.

En palabres del diputáu d'UPyD, dende la dirección del centru "tán poniéndose torgues a l'actividá normal de la UTE que ponen en riesgu la continuidá d'esti proyectu", matizando que se trata d'una "preocupación" que treslladaron los mesmos familiares de los usuarios.

Martín matizó estes quexes. "Hai datos", señala la diputada d'IU, que "avalen lo que ta pasando". Por exemplu, el fechu de que los presos derivaos del centru penitenciariu a la UTE baxaron de 122, nel 2011, a 62 nel 2012. Amás, recordó qu'a últimos del pasáu añu, la dirección del centru negó l'accesu a la cárcel a l'abogada de l'asociación Adsis, que trabaya na Unidá.

Éstos y otros motivos, como la negativa a dellos funcionarios a participar en comisiones rellacionaes, fueron la causa de que'l diputáu d'IU nel Congresu, Gaspar Llamazares, pidiera la destitución del centru.

La proposición presentada esti llunes nun pide la dimisión, pero sí la garantía de "la continuidá d'esti proyectu, eliminando cualquier actitú contraria". Tamién se pide que se facilite'l trabayu de los profesionales y que se renueven les Comisiones de Servicios d'Educadores; l'apoyu al modelu de derivación de los internos a los recursos terapéuticos; y la restitución a la Fundación Adsis nos llabores de collaboración que venía realizando.