Los bomberos apaguen un incendiu nuna casa de madera de L.lena

Efectivos de Bomberos d'Asturies con base nel parque de Mieres apagaron un incendiu nuna cabana de madera que s'utilizaba como vivienda de fin de selmana na población de Xomezana Riba, nel conceyu de L.lena.

El fueu, que nun provocó daños personales, xamuscó dafechu l'inmueble de dos plantes, y amás tamién resultó afectada una construcción llendera.

El Centru de Coordinación d'Emerxencies del 112-Asturies recibió l'avisu a les 21.47 hores d'esti domingu. Na llamada indicaben que taba quemando una casa de madera de dos plantes ubicada nuna finca aislada. Esplicaben que nun había naide nel so interior y que yera un vivienda sin habitar que s'utilizaba de fin de selmana.

De momentu movilizóse una dotación, compuesta por trés efectivos, de Bomberos d'Asturies con base nel parque de Mieres que se treslladaron al llugar con una autobomba urbana y un vehículu de patrullaxe y primer ataque.

Los bomberos dieron por controláu'l fueu a les 23.30 hores del domingu pero permanecieron nel llugar, realizando llabores de ventilación, enfriamientu y desescombriu, hasta les 01.18 hores d'esti llunes, que se retiraron pa tornar a la so base.

Amás d'informar de lo asocedío a la Guardia Civil y a títulu informativu al Serviciu d'Atención Médica Urxente (SAMU), el 112-Asturies tamién alertó a los técnicos de la compañía eléctrica pa que cortaren el suministru y los bomberos pudieren trabayar con mayor seguridá.