Asuntos hidro-ilóxicos
Psicolóxicamente, el branu foi durísimu. Los poderes yá fixeron tolo posible pa metenos el mieu en cuerpu: resulta que quitabes el tapón del bañal y, ¡rediola!, quedaba’l pantanu, un suponer, d’Arbón, más secu que’l Gobi. Nun hai derechu. Eso, escúsenme, acoyona y pa encima ta ente la media verdá y la mentira.
Mui necesaria la educación ecolóxica, pero vamos ver, lo de nun dicilo too y concienciar selectivamente paezse yá endemasiao a aquello de “por el mar corren las liebres, por el monte las sardinas, tralará”. A esti pasu acabarán diciendo qu’Asturies tien que baxar dos tonos de verde y olvidar la so identidá surdida tamién de l’abundancia d’agua, mentes n’Almería aporfien en poner tomates nel desiertu y n’Albacete quieren xardinos d’herba.
Asina que, venga, destupan ustedes les alcantarielles. Porque al rau de la globalización del agua, que vien a ser como la tresculturación pero en dos partes d’hidróxeno y una d’osíxeno, habrá quien suañe con que les gotes fríes caigan tamién equí, frañendo les estadístiques pero homoxeneizando, que ye de lo que se trata, anque namás seyan los climogramas.