El conseyeru d'Infraestructures y Mediu Ambiente, Francisco González Buendía, aseguró esti xueves que la incineradora de Serín namás quemará lo imprescindible de la fracción restu que se produza n'Asturies, y repitió que nun va almitir residuos d'otres comunidaes.

Buendía quiso salir otra vuelta al pasu de los barruntos plantegaos por Izquierda Unida nesti sen, tres la celebración del Conseyu d'Alministración de Coxersa.

En declaraciones a los medios, el conseyeru repitió lo yá espresao: "Coxersa va llevar lo imprescindible de la fracción resto a la incineradora y nun va traer residuos de fuera d'Asturies".

Reconoz que "igual hubo algún tipu de tracamundiu, polo que contién el plan de residuos, que contempla la posibilidá de traelos d'otros llugares, pero non necesariamente pa que vayan a Coxersa". "Pue ser que nos puertos o otros llugares haya algún tipu de chatarres", añadió, pero matizando que "la incineradora va ser puramente pa los residuos que se xeneren y nun puean reciclase, la fracción restu".

El responsable autonómicu confirmó que se caltienen los plazos pa que les trés empreses escoyíes faigan les sos ufiertes y confía en zarrar l'axudicación del proyectu antes qu'acabe'l presente añu.

Campañes de recoyida d'ORGÁNICOS

Pela so parte, el xerente de Coxersa, Santiago Fernández, adelantó que'l Consorciu va siguir desarrollando campañes de recoyida de materia orgánico "hasta que s'inaugure a mediaos del 2013 la planta de biometanización".

Asina, anunció la creación de dos nuevos puntos llimpios, dientro del plan que ta previsto pa toa Asturies, y nel que yá se tán construyendo cinco nestos momentos: Villaviciosa, Llanes, Castropol, Somiedu y Grandas.