A Oficina do Peregrino de Santiago recibiu no que vai de Ano Santo un total de 269.080 persoas ata o 11 de decembro para selar a Compostela, un 54 por cento máis que no mesmo período de 2009, —145.344 camiñantes—. Esta cifra tamén supera ao total que chegou á entidade en todo o Xacobeo 2004, cando a capital galega acolleu un total de 179.944 peregrinos.

Segundo detallou a Europa Press a coordinadora da Oficina do Peregrino, María José Eiras, estes datos positivos "reflicten o tirón da cidade santa no ano xubilar", xa que, tal e como asegurou, a entidade que dirixe recibiu "máis de 1.700 camiñantes nesta ponte de decembro".

Concretamente, a Oficina do Peregrino selou entre os días 4 e 8 de decembro un total de 1.718 Compostelas, o documento que se entrega a aquelas persoas que realizan máis de 100 quilómetros do Camiño de Santiago a pé, cabalo ou bicicleta.

O día da ponte na que Santiago acolleu un maior número de peregrinos con esta distinción foi a xornada do 8 de decembro, con 539 camiñantes. Con todo, esta cifra non se diferencia moito a recibida este sábado día 11 de decembro, no que a Oficina do Peregrino selou 473 Compostelas, un dato que, conforme explicou María José Eiras, "pode deberse a que moitos peregrinos aproveitaron a ponte" e prolongaron as súas vacacións "ata a fin de semana".

Este grande número de Compostelas seladas coincide coa elevada afluencia de visitantes a Santiago de Compostela na recta final do ano santo seguen sendo as colas que hai que esperar para acceder á Catedral. Así, este domingo, ás 12.00 horas, a fila para acceder ao templo pola praza de Praterías bordeaba o edificio pola rúa Fonseca ata chegar ao Obradoiro —algo máis de 200 metros—.

Memoria do xacobeo

Segundo adiantou a responsable da Oficina do Peregrino, en xaneiro de 2011 "está previsto" que se publique unha revista con datos detallados dos peregrinos que recibiron a Compostela na capital de Galicia en 2010.

O documento recollerá o número de camiñantes, a procedencia, idade, sexo e mesmo datos acerca da profesión ou o motivo polo cal os peregrinos realizaron o camiño.

Polo momento, conforme explicou María José Eiras, os interesados poden consultar os datos que xa foron almacenados ata a actualidade pola Oficina que dirixe na web www.peregrinossantiago.org.