Celebramos güei con devoción humorística’l Día de los Santos Inocentes, con muñecos de papel pegaos na espalda, con titulares cachondos nos periódicos más formalonos. Mas, con tola intención d’aguar la fiesta, quixere recordar qu’esta xornada tien esa lleenda baxo’l númberu ventiocho na fueya d’avientu nel calendariu que te regaló la pescadera del barriu, porque cuenten papeles mui antiguos qu’Herodes l’armara pero que mui gorda colos neños de menos de dos años.

Propongo que mos alcordemos entós de los rapacinos mineros y de los del pegamín, sí, agora mesmo, rutiando tovía’l cabritu. Una memoria fonda y resentida con quien dixo esfrutar de la explotación sexual de neñes nun país asiáticu o quién sabe si en latitúes y lonxitúes cada vez más próximes.

Tamién con resquemor mando un saludu a tolos cantantes de rock o hiphop “comprometíu” -téngolos visto- que dalguna nueche de gloria saltaron al quioscu calzando playeros d’esos que nun dexen puntada ensin filu na vida de dalgunos guajes que de tan inocentes fáensenos invisibles.