Tuvi va dos años nun congresu que trataba la relación ente l’espor, los medios de comunicación y los valores educativos. Dende’l llau universitariu, gocié la oportunidá de participar nun linchamientu dialécticu al daquella subdirector del As. Depués d’una riestra de tópicos sobre la sacrosantidá de les sos firmes nesti sen, el moderador abrió’l turnu de preguntes.

En cuantes pudi, garré’l micro y aventé’l noxu que guardaba contra aquella mesa d’executivos. «¿Ye usté a esplicame qué valores quier tresmitir el so diariu zarrando tolos díes cola foto d’una muyer desnuda?». La verdá ye que l’auditoriu, cargáu de profesores de tolos graos y estudiosos de l’actividá ludoeducativa, españó nun aplausu. Juan Mora acabó d’arreglalo xugando a facer gracia. «El nuesu periódicu ta llen de mozos en calzoncíos, había que compensar».

El públicu refugó les sos palabres hasta reventar l’actu. En fin, ta mal xeneralizar, pero agora que los mass media allorien coles cames hipobáriques y la crioterapia, esta anécdota recuérdame que siguen siendo ellos quien más lo necesiten.