La V Edición del Festival del Arcu Atlánticu de Xixón, prevista de primeres pal 23 al 31 de xunetu, a lo último nun se va celebrar, al votar en contra los representantes de PSOE, IU y Xixón Sí Puede (XSP) na Xunta Rectora de la Fundación Municipal de Cultura (FMC) d'esti llunes. A favor del eventu, que contaba con un presupuestu de 194.00 euros de la FMC, namás votó Foru, partíu que gobierna na ciudá, y Ciudadanos, mientres que'l PP astúvose.

Per parte de Xixón Sí Puede acusóse al Gobiernu llocales de Foru de "dexar morrer" el Festival del Arcu Atlánticu al refugar presentar un nuevu proyectu de programación na Xunta Rectora de la Fundación Municipal de Cultura (FMC).

Asina lo caltuvo, al traviés d'una nota de prensa, tres l'alderique na citada Xunta Rectora de la propuesta de programación pal V Festival Arcu Atlánticu. El documentu sometióse a la valoración y votación de los grupos municipales, sin que sicasí hubiera un marxe pal diálogu y la reformulación del eventu, según XSP.

Nesti sen, defendió la so dimensión cultural, de la que llamentó qu'ésti seya un aspectu "que por desgracia ta ausente del proyectu presentáu por Foru", añadió. Al contrario, Foru presentó, al so xuiciu, un programa de conteníos "etéreos, ambiguos y faltos de conteníu cultural". Por esti motivu, y col oxetivu de que'l Festival Arcu Atlánticu siguiera teniendo presencia na ciudá, XSP propunxo la retirada de la programación y la presentación d'un nuevu proyectu nos próximos díes.

Sicasí, l'Equipu de Gobiernu insistió en caltener la so programación, polo que XSP votó en contra del proyectu. Nel mesmu sen, manifestáronse PSOE ya IU, "anque nesti casu nun hubo alternatives sobre la mesa nin amagos de sacar alantre'l Festival", repostió.

Por too ello, XSP llamentó que la actitú "testerona" de la conceyala d'Educación, Monserrat López, torgue la celebración d'una nueva edición del Arcu Atlánticu, una iniciativa que tendría de valir pa consolidar pontes coles cultures de la rexón atlántica y arriquecer la mesma.

"Esto consíguese con programaciones sólides y coherentes, nes que tea claru'l filu conductor y l'oxetivu del Arcu Atlánticu, y non con una suma aleatoria d'eventos que tornen en feria lo que debería de ser un auténticu Festival", defendió.

Tamién IU a defendíu esti llunes, en rueda de prensa previa a la Xunta Rectora, que nun consideraben el Festival daqué prioritario pa la ciudá, sinón qu'había otres partíes que podríen vese elevaes col presupuestu d'ésti, como pueda ser la d'alquisición de fondos pa biblioteques o les sovenciones a entidaes culturales. Tampoco alcontraron encaxe nes feches en que se celebra, al existir yá munchos eventos lúdicos nel branu xixonés.