L'escritor sierense Pablo X. Suárez va ser l'autor convidáu nel mes de marzu a los alcuentros colos llectores que vien entamando dende'l 2015 el Taller de Llectura n'Asturianu del Serviciu de Normalización Llingüística de Corvera.

Pablo X. Suárez (Orviz, Siero, 1981), escritor, filólogu y responsable del Servicio de Normalización Llingüística de la Comarca de la Sidra, ye autor de dellos poemarios ('Asturiana Beat', 'El sistema débeme una chocolatina'), ta presente en diferentes antoloxíes de poesía asina como de relatos ('Vía de serviciu', 'Asturies cuenta', 'Contadores de lluz', 'Camín de Bimenes', 'Leyendas urbanas', 'Asturcones', 'Contra'l silenciu', 'La prueba del once'). ye responsable del blog diariosdeyoni.wordpress.com ya ideólogu y alma mater de les Timbes poétiques que llevan la poesía a la nueche asturiana.

Nesta actividá d'animación a la llectura p'adultos de calter de gratuito, participaron ente abril y avientu, media docena d'escritores: Antón García, Ismael González Arias, David Artime, Marta Mori, Xurde Álvarez y Xandru Fernández.

Nel añu 2016 dicha actividá, consistente na llectura de llibros y alcuentros colos autores de los mesmos, tien continuidá buscando en tou momentu ofrecer la pluralidá y diversidá de voces y temátiques de la lliteratura asturiana actual. Si en febreru les sesiones entamaron col escritor corveranu Berto García, nel presente mes de marzu vamos contar cola presencia del escritor Pablo X. Suárez, que va tar el próximu xueves 3 de marzu a les 18,00 h. nel Centru Sociocultural de Las Vegas.