El cursu entama con un sele descensu d'alumnos n'Infantil y Primaria

El cursu escolar entama esti xueves nos ciclos d'Infantil y Primaria con un llixeru descensu de 137 alumnos, en comparanza col añu pasáu, hasta los 69.018 estudiantes, que nun 71,88 por cientu auden a centros públicos calteniendo l'enclín de los últimos años.

El cursu escolar entama esti xueves nos ciclos d'Infantil y Primaria con un llixeru descensu de 137 alumnos, en comparanza col añu pasáu, hasta los 69.018 estudiantes, que nun 71,88 por cientu auden a centros públicos calteniendo l'enclín de los últimos años.

En concreto, empiecen les clases de segundu ciclu d'Infantil 15.730 alumnos en centros públicos y 6.248 na privada-concertada; mientres qu'en Primaria va haber 33.877 estudiantes na pública y 13.163 na privada-concertada.

En rueda prensa, el conseyeru d'Educación y Cultura del Principáu, Genaro Alonso, señaló en compañía de tol so equipu que la inauguración del cursu celebraráse esti miércoles nel CPEB de Cabanaquinta, nel conceyu d'Ayer, mientres que la de Secundaria y Bachilleratu va llevase a cabu'l día 15 nel IES Marqués de Casariego, en Tapia.

Igualmente, esplicó que yá se caltuvieron xuntes con directores de centros d'Infantil y Primaria, y que van celebrase tamién en próximos díes con responsables de centros concertaos y privaos, asina como colos de conservatorios, escueles d'idiomes y otros centros de formación específica.

Al respective, el conseyeru mostróse confiáu en que'l cursu empiece "con normalidá" y que los centros vayan axustándose lo mesmo al nuevu modelu d'alquisición y ayudes a llibros de testu como a l'aplicación de la Lomce, sobre la que calcó en qu'al gobiernu asturianu nun-y presta la nueva llei pero, mientres nun pueda modificala, va aplicala en base "a principios de llegalidá que comprometen y obliguen" a l'alministración autonómica.

Tocantes a los profesores, el conseyeru recordó que'l sistema va contar esti cursu con unos 10.690 docentes, de los que 9.747 van tar a xornada completa.

Amás, calcó en qu'amplía en 4 docentes la plantiya na rede de 0 a 3, qu'algama los 527 profesores esti cursu "magar el descensu de 178 neños" y avánzase na "pareya educativa", puesto que toles escueles infantiles cuenten "polo menos col doble de técnicos que d'unidaes". "Asturies ye la única comunidá na que se produz esta situación", afirmó, recalcando nel ratio promediu de 6,15 alumnos por docente.

Mostrar comentarios

Códigos Descuento