El presidente asturianu en funciones y candidatu a la reelección, Javier Fernández, dixo esti miércoles, tres reunise con tolos grupos políticos que llograron representación, que tien previsto promover una segunda vuelta de contactos. Sicasí, na mesma yá nun va tar el PP, puesto que la so presidenta, Mercedes Fernández, yá-y dixo que va promover la so propia candidatura pa ser presidenta.

Javier Fernández pronuncióse nestos términos, a preguntes de los periodistes, dempués de que Mercedes Fernández dixera que nun refugaba siguir falando col socialista. Nes últimes elecciones autonómiques n'Asturies, el PSOE llogró 14 diputaos, el PP 11, Podemos 9, IU 5, Foru 3 y Ciudadanos 3.

Nel alcuentru cola candidata del PP, el más llargu con una hora y media de duración, Javier Fernández esplicó que falaron fundamentalmente de cuestiones prioritaries p'Asturies, dende la tarifa eléctrica o la minería, "pasando pela financiación autonómica, amás de cuestiones relatives a la gobernabilidá".

Merced Fernández treslladó-y al socialista la so intención de presentase al procesu d'elección del presidente, daqué que Javier Fernández considera "lexítimo".

Lo que pretende Javier Fernández con estos contactos ye llograr un gobiernu n'Asturies que tenga la "mayor estabilidá posible". Sicasí, esplicó que tamién ye "realista" y que tien poca confianza en conformar un gobiernu de llexislatura con otres fuerces, puesto que yá dicen públicamente que nun tán pol llabor de compartir executivu.

N'escuchando a tolos líderes de les distintes fuerces polítiques, Javier Fernández reconoció que col que más sintonía tuvo ye col candidatu d'IU, Gaspar Llamazares. Anque dexó claro que tolos alcuentros fueron cordiales.

Nos alcuentros nun se faló de conceyos y de les nueves situaciones polítiques municipales que se tán dando, según esplicó Fernández a los periodistes.