El diputáu na Xunta Xeneral del Principáu d'Asturies Ignacio Prendes, dau de baxa esti miércoles pola dirección nacional d'UPyD, anunció esti xueves que dexa'l so acta de diputáu rexonal.

Prendes compareció nuna rueda de prensa n'Uviéu, casi a la mesma hora que, dende Madrid, la vocera nacional d'UPyD, Rosa Díez, pidía públicamente a Ignacio Prendes, y a los eurodiputaos Enrique Calvet y Fernando Maura, suspendíos cautelarmente de militancia, que dexaren los sos escaños.

Prendes, qu'amás ye miembru de la Mesa de la Cámara, va reunise nes próximes hores colos servicios xurídicos del parlamentu asturianu pa tramitar el so cese. Tamién van dexar de trabayar darréu toles persones que trabayen con él nel Grupu Mistu.

Ye diputáu dende'l 2012, cuando UPyD llogró representación la primer vez n'Asturies, con un diputáu. El so papel foi determinante mientres la llexislatura. Ello ye que'l so votu foi clave pa que la elección del socialista Javier Fernández como presidente del Principáu. Daquella PSOE y UPyD soscribieren un acuerdu de llexislatura, que s'atayó a últimos del 2013, cuando Prendes acusó al PSOE d'incumplir el pactu no que cinca a la reforma electoral.

Prendes, unu de los fundadores d'UPyD, lleva siendo críticu cola dirección nacional dende va tiempu. Abandonó'l Conseyu Políticu fai aprosimao un añu, al entender que lo más conveniente yera llegar a un acuerdu con Ciudadanos. Volvió salir escoyíu candidatu d'UPyD pa les elecciones asturianes de mayu.

Sicasí, el so cese n'UPyD llegaba esti miércoles, dempués precisamente d'una asamblea con afiliaos na qu'apoyaron la idea de llegar a un acuerdu con Ciudadanos pa ellaborar una candidatura conxunta n'Asturies.

ESPULSIÓN

La dirección nacional basa la so decisión d'espulsalu en que considera que Prendes incurrió nel supuestu automáticu de baxa del partíu previstu nel artículu 9 de los sos estatutos. Aleguen que la secretaria de Prendes na Xunta Xeneral, dada tamién de baxa d'UPyD, ye tamién la representante llegal de Ciudadanos ante la Xunta Electoral d'Asturies.

Prendes esplicó esi estremu y restó-y importancia. Reconoció que foi él personalmente'l que-y pidió a la secretaria que realizara'l trámite burocráticu ante la Xunta Electoral el día 8 d'abril. Foi dempués de que falara con Ciudadanos y que comprobara qu'había una opción real pa llegar a un entendimientu. Puesto qu'acababa'l plazu pa facelo, tomó la iniciativa de realizalo.

El tovía diputáu rexonal insistió en que la muyer nun cobra d'UPyD, sinón del parlamentu asturianu, concretamente del Grupu Mistu. "Pidí-y que la nomaren representante d'esa candidatura, pa que los trámites burocráticos y de xestión electoral nun torgaren l'acuerdu políticu", esplicó.

El fechu de que la dirección nacional diga que lu espulsa por eso, Prendes atribúilu a la "burbuya conspiranoica" y el "deliriu sancionador" que s'apoderó del partíu dirixíu por Rosa Díez.

La verdadera razón de la so espulsión, según Prendes, ye la celebración de l'asamblea d'esti miércoles, na que los afiliaos asturianos apoyaron la so propuesta d'ellaborar llistes conxuntes pa les próximes elecciones. "Sabía la consecuencia de la celebración d'esa asamblea, que tendría una espulsión sumarísima", manifestó, acatando la decisión d'UPyD.

EMOCIÓN,

Ciudadanos y plataforma

Prendes, que defendió la llexitimidá de l'asamblea, va siguir cola so fueya de ruta pa llograr esa llista conxunta con Ciudadanos n'Asturies. Eso sí, nun se va afiliar a Ciudadanos. "Paeceríame una falta de respetu a los militantes d'esi partíu", comentó.

Na rueda prensa, que tuvo que parar nuna ocasión pola emoción, Prendes dixo que mientres estos años nel parlamentu asturianu'l so únicu oxetivu foi defender el programa electoral col que se presentó, el d'UPyD. Pero esplicó qu'a nivel orgánicu, apostó siempre pola confluencia con Ciudadanos.

Él mesmu militó en Ciudadanos nel 2007. Tamién otros afiliaos d'UPyD. "Conocemos, venimos del mesmu tueru", señaló. "N'ocasiones hai que cambiar de sigles pa siguir defendiendo les mesmes idees", apuntó.

El so oxetivu ye que los asturianos tengan la oportunidá de votar una "tercer vía", porque consideren que ye lo que pidieron "a berros" nes últimes elecciones andaluces. Si fracasa y los votos nun-y dan la razón, Prendes dixo que nun tien problemes en volver a la so carrera profesional como abogáu.

En tou casu, nun tien previsto los pasos a siguir pa recoyer a tolos "náufragos" d'UPyD que piensen como él y que piden confluyir con Ciudadanos. Pa ello, decidió promover una asociación denominada 'Plataforma Encuentro' de calter nacional na que van tener cabida toes eses persones.

"Daquién tenía que salir a campu abierto nesta guerra de trincheres", comentó Prendes, argumentando que n'UPyD Asturies yá fueron "pioneros" en munches coses, incluyendo pactos electorales y teniendo que moyase".

Ello ye que considera que la negociación que s'abre agora, ye ente UPyD Asturies y Ciudadanos. "Otra cosa ye qu'a los lexítimos representantes d'UPyD n'Asturies quitáronomos la nuesa casa", llamentó. Al so xuiciu, la negociación va ser "ente persones" y non "ente sigles o marques".