El presidente del Gobiernu, Mariano Rajoy, va avanzar "delles llinies" de la reforma fiscal que prepara l'Executivu nel Alderique sobre l'estáu de la Nación, que se va celebrar los próximos 25 y 26 de febreru, según afirmó esti martes la vicepresidenta del Gobiernu, Soraya Sáenz de Santamaría, nuna entrevista en RNE recoyida por Europa Press.

Sáenz de Santamaría señaló que'l Gobiernu tuvo qu'adoptar decisiones que nun-y gustaron, en relación a la xubida d'impuestos, porque mientres los años de la crisis perdiéronse 70.000 millones d'euros en recaldación.

"Agora, lo qu'hai que tratar ye de revertir na midida de lo posible esa situación. Ye meyor tener unos impuestos afechos, que nun penalicen a quienes pueden crear empléu, qu'ayuden a les clases medies a consiguir tener una mayor capacidá d'aforru y consumu, porque eso ye lo que tira de la economía", sorrayó la vicepresidenta.

Nesti sentíu, y preguntada por cuándo va cumplise la promesa electoral del PP de baxar impuestos, Sáenz de Santamaría declaró que, anque ye pocu partidaria de promeses electorales, "lo que se faiga va faese antes de les elecciones xenerales".

En relación a qué va asoceder col Impuestu sobre'l Valor Añadíu (IVA), la vicepresidenta del Gobiernu recordó que'l ministru de Facienda y Alministraciones Públiques, Cristóbal Montoro, "foi bien claru sobre'l IVA y sobre lo que piensa".

Dos años de reforma llaboral.

Sobre la reforma llaboral, que mañana cumple dos años dende la so entrada a valir, la vicepresidenta señaló que la so mayor virtú y el "gran cambéu" que supunxo ye la posibilidá de crear empléu netu con crecederes de la economía inferiores al 2% o'l 3%.

Ello ye que destacó que nel últimu trimestre de 2013 llogróse crear empléu netu, en términos desestacionalizados, con una crecedera del PIB del 0,3%.

Preguntada por si la llexislatura va acabar con menos paraos de los qu'había al empecipiase, Sáenz de Santamaría recordó qu'esi foi un compromisu asumíu pol presidente y qu'hai que siguir trabayando pa faelo posible.

Tocantes a les previsiones sobre'l PIB, la vicepresidenta indicó que'l Gobiernu suel ellaborales con prudencia y que'l consensu asitia la crecedera p'anguaño nel 0,7%, el 0,8% o'l 1%. "Lo importante ye que vamos crecer y eso yá ye un cambéu bien significativu al respective de los años anteriores", concluyó.