O voceiro do PP galego, Pedro Puy, remitiu este luns unha carta aos voceiros dos grupos da oposición — PSdeG, AGE e BNG— na que os convoca para manter unha reunión na que explicar a redución de deputados que propón a formación, así como outras cuestións susceptibles de ser abordadas na reforma da lei electoral.

No escrito, Puy recorda que o PP incorporou ao seu programa das últimas eleccións autonómicas o proxecto de reducir o número de deputados no Parlamento de Galicia dentro da galla prevista no Estatuto —que fixa o número de escanos entre 60 e 80 para "garantir a representatividade" das diversas zonas de Galicia—. A priori, a proposta dos populares é rebaixar de 75 a 61 os escanos.

Ao tempo, ratifica que é "intención" do Grupo Popular "dar cumprimento" a este compromiso electoral e que aposta "firmemente" por alcanzar "o máximo consenso posible" nas decisións que se adopten.

Deste modo, o PPdeG considera que "sería útil" manter unha reunión cos voceiros dos demais grupos parlamentarios representados na Cámara para explicar esta redución, así como outras cuestións que os populares están interesados en abordar como a regulación legal dos debates electorais nos medios públicos ou a duración da campaña.

Antes de remitir o escrito, tras a reunión de grupo, Pedro Puy volveu reiterar a oferta de diálogo para alcanzar un consenso e alegou que, despois de paralizarse esta reforma a finais da lexislatura pasada, agora se retoma coa diferenza de que vén avalada por un "mandato electoral" das urnas.

Preguntado varias veces por se os populares van levar a cabo con ou sen consenso esta reforma, eludiu unha resposta taxativa e apelou a que hai que esperar a ver que formula a oposición. De tódolos xeitos, o propio presidente da Xunta, Alberto Núñez Feijóo, e outros dirixentes populares afirmaron en varias ocasións que o recorte de deputados se levará a cabo.

Non inicial da oposición

Os grupos da oposición, que confirmaron a recepción da carta remitida polo voceiro, manteñen a súa non inicial á proposta de reducir deputados na Cámara autonómica posto que, a priori, ven nesta medida un "recorte da democracia" ou, en palabras do socialista Abel Losada, un "tic totalitarista".

Nos grupos reside a vontade de escoitar a proposta, que aínda non teñen por escrito, aínda que o BNG xa advertiu de que non ten intención de "entrar nese terreo de xogo", e todos coinciden en que se trata dunha actuación para favorecer os intereses electorais dos populares galegos.

Este mesmo luns, Losada apuntou que considera esta medida unha "cortina de fume para tapar situacións incómodas" ha posto de manifesto que mentres que os socialistas apostan por reducir o número de empregados", os populares falan de "reducir deputados", algo que non é un dos problemas "fundamentais" dos galegos.

Pola súa banda, o deputado de AGE Xabier Ron tamén coincidiu en cualificar esta proposta en "cortina de fume para desviar a atención", nun momento en que "o que está en cuestión é a propia credibilidade do presidente da Xunta".

En canto ao BNG, a vicevoceiro do grupo, Ana Pontón, sinalou que a súa formación "non está por dar o debate nos termos que formula o PP", porque "é un recorte á democracia e moi demagóxico". En lugar diso, considera necesarias outras reformas da Lei electoral que supoñan dotar de maior proporcionalidade ao Parlamento.