L'alcalde del conceyu asturianu de Cabrales, José Antonio Pérez, de Foru Asturies, presentó esti xueves la so dimisión nel Conceyu.

José Antonio Pérez resultó condenáu recientemente a siete años d'inhabilitación por un delitu de prevaricación y absueltu del delitu de malversación de caudales públicos, nuna sentencia de l'Audiencia Provincial d'Asturies, contra la que cabe recursu ante'l Tribunal Supremu.

La so dimisión produzse dempués de qu'esta mesma mañana, el presidente de Foru, Francisco Álvarez-Cascos dixera que confiaba en que tanto'l rexidor de Cabrales como'l de Ponga, tamién condenáu, tomaren la so decisión d'acuerdu al Códigu Éticu del partíu, qu'implica "comunicar l'abertura de cualquier procedimientu xurisdiccional del que puean derivase nicios racionales de comisión d'un delitu, y poner a disposición del partíu'l cargu públicu nesi momentu".

Nel escritu presentáu pol alcalde, al qu'accedió Europa Press, José Antonio dixo que toma la decisión ante les pruebes condenatories. "Soi consecuente cola mio responsabilidá y dexo claro que naide del mio partíu me presionó pa tomar esta decisión", indicó.

Acata la sentencia, anque señala que tien la conciencia "bien tranquila". Nesti sen, señala que la mesma sentencia que lu condena confirma que nun recibió beneficiu algún.

"La sentencia diz que se me condena porque presume que tenía de conocer el procedimientu para nomar al teniente alcalde con dedicación esclusiva y condénaseme basándose la sentencia nun barruntu de que yo lo conocía. Pueo asegurar que desconozo esi procedimientu alministrativu y casi tolos procedimientos alministrativos, asina como la contabilidá del Conceyu. "A mi nun se m'escueye poles mios conocimientos xurídicos nin contables", indicó.