El diputáu del Grupu parlamentariu del PP, Alfonso Román López, va ser l'encargáu de presidir la comisión parlamentaria que va investigar la xestión desarrollada nos años previos pola Fundación del Centru Niemeyer. La comisión, constituyida esti llunes, va tener a la diputada d'IU, Emilia Vázquez, como vicepresidenta y al representante de Foru Asturies, Manuel Peña, como secretariu.

Esta comisión, constituyida a pidimientu del Partíu Popular, va tratar d'esclarar les posibles responsabilidaes que se deriven de la situación económica en que s'alcuentra la Fundación y de la xestión desarrollada n'años precedentes.

Nesti sen, la presidenta del PP, Mercedes Fernández, manifestó tres la constitución de la comisión, qu'espera "que s'esclare'l destín del dineru público que llegó al centru Niemeyer y sobre'l que nun se dieron esplicaciones".

"Queremos establecer criterios de tresparencia, claridá y responsabilidaes polítiques, porque nun pue xestionase dineru público impunemente sin dar esplicaciones y sin devolver lo que tuvo mal xestionáu", destacó Fernández.

La presidenta del PP criticó amás l'actitú de l'alcaldesa d'Avilés, la socialista Pilar Varela, dao qu'al so xuiciu "tendría que cesar como patrona del Niemeyer".

Dende'l PSOE, el so diputáu Vicente Herranz, indicó que'l compromisu del so grupu, y del partíu, ye'l de buscar la máxima tresparencia y ver los posibles errores que se cometieren na xestión.

Pero amás indicó que se trata amás de devolver al centru'l valor que tien, tres quedar "degradáu y machucáu col gobiernu de Foru Asturies que trató de desprestixalu". Añadió que Pilar varela ta nel patronatu de la Fundación "como alcaldesa d'Avilés, porque asina la escoyeron los ciudadanos".

Pela so parte la diputada d'Iu y vicepresidenta de la comisión, Emilia Vázquez, indicó qu'espera qu'esta comisión valga pa poner los calces de que la xestión del dineru público seya "tresparente y eficaz".

"Hai que ver los defectos qu'hubo na xestión pa poder establecer los mecanismos que valga pa qu'esos defectos nun se repitan", dixo Vázquez.

Dende UPyD, Ignacio Prendes, indicó que lo que se busca ye "facer efectivu'l principiu de tresparencia y que los asturianos conozan cómo foi la xestión del dineru público, una xestión sobre la qu'hai munches dudes".

FUNCIONAMIENTU

La comisión ta integrada por nueve vocales, dos diputaos de cada grupu, nun siendo nel casu d'UPyD, que namás cuenta con un representante na Xunta Xeneral. Nos próximos díes la comisión volverá reunise pa establecer yá un calendariu de comparecencies.

De momentu'l PP ye l'únicu grupu qu'esclaró que va pidir les comparecencies de los miembros del patronatu del Centru Niemeyer, lo mesmo que de los representantes políticos de les distintes alministraciones que tuvieron que ver cola xestión del centru.