El voceru d'IU na Xunta Xeneral d'Asturies y coordinador de la formación n'Asturies, Jesús Iglesias, dixo esti llunes que "l'amenaza" del Ministeriu de Facienda de tutelar les cuentes asturianes ye "escomanada". Y amás considera que'l Gobiernu de Mariano Rajoy "condicionó" el próximu debate d'investidura n'Asturies, que va tener llugar el próximu día 22, y nel qu'Iglesias cree qu'esti asuntu va ser protagonista.

En declaraciones a los periodistes antes de participar na xunta de la Xunta de Voceros, Iglesias dixo qu'hai otres comunidaes autónomes nuna situación financiera muncho más preocupante que l'asturiana.

Y que nun pue valir d'argumentu pa un anunciu d'esti tipu que nun hai tovía un gobiernu estable n'Asturies, porque ésa ye una cuestión que va resolvese en pocos díes.

Reprocha Iglesias al Ministeriu que creara un clima d'inestabilidá y deteriorara la imaxe pública al realizar esi anunciu esti fin de selmana sin esplicalo. Constitúi, al so xuiciu, una "terrible irresponsabilidá" del Gobiernu de Mariano Rajoy.

Pero tamién ve irresponsabilidá nel Gobiernu en funciones de Francisco Álvarez-Cascos. "Dexómos asustaos cuando hai unes selmanes dixo que nun precisaba enviar nuevu plan saniamientu financieru porque enviara ún >que siguía siendo válidu y que tábamos en situación de superávit", acabó.